Tut tenor il motto «prender sez per mauns» è la finamira da la societad cooperativa «Pro Salouf» clera: La butia da vischnanca duess uschè spert sco pussaivel puspè avrir.
La butia è in zic sco ina avaina da vita per il vitg. Perquai vulain nus per mort e fin mantegnair ella.
Nov concept
Bainspert è il plan stà sin maisa. Il concept futur duess esser quel da «la stizun» ch'i dat gia cun success a Vignogn en Val Lumnezia. Il concept prevesa che la butia è averta 24 uras durant 7 dis l’emna cun in sistem da «self checkout». Entrar pon ins cun la charta da banca. Durant uras definidas vegn la stizun era tgirada.
Sustegn da la vischnanca
Dacurt ha la «Pro Salouf» preschentà lur plan da gestiun a la suprastanza communala da Surses. Era cun la dumonda da sustegn da la vischnanca. Sco il president communal Daniel Wasescha ha ditg sin dumonda dad RTR haja il concept persvadì. La suprastanza haja decidì da dar la schanza e metter a disposiziun gratuitamain las localitads che tutgan a la vischnanca per ils proxims trais onns. Era la stizun che serra la fin d'october, il Prima, ha la vischnanca sustegnì cun localitads senza tschains, nagins custs d'electricitad ed ina contribuziun annuala da 5'000 francs. La «Pro Salouf» survegn uss pia pli pauc sustegn da la vischnanca che fin uss.
La concessiun da la vischnanca saja franc in agid, di Gianna Sonder da la «Pro Salouf», ins possia dentant bain sa dumandar pertge ch'i dettia pli pauc sustegn ch'avant. Sco il president communal Daniel Wasescha di, saja gist en ina vischnanca fusiunada cun differentas fracziuns impurtant dad empruvar da tractar tuts tuttina. Uschia declera el la decisiun da la suprastanza communala.
Emprims pass en la gista direcziun
Cun il consentiment da la vischnanca e la fundaziun da la societad cooperativa «Pro Salouf» ch'è tar ils davos pass, sajan ils emprims pass impurtants per mantegnair la butia a Salouf fatgs, di Gianna Sonder.
Il sustegn da la vischnanca è in segn da consentiment per la stizun.
Sco proxim valia uss da generar raps, saja quai cun agid da fundaziuns sco per exempel l'agid da muntogna, persunas privatas u cun prender si in credit. Er il persunal stoppia vegnir recrutà, tge che saja sper la finanziaziun ina da las grondas sfidas. Bainprest vegnia la pagina d'internet da la «Pro Salouf» activada – e lura giaja era per chattar commembers e commembras. La finamira ambiziusa da la «Pro Salouf» è tenor Gianna Sonder da pudair avrir la butia per la stagiun d'enviern.