La VIVAL Lumnezia maina gia trais stizuns en Lumnezia, uschia ils Volgs a Vella ed a Morissen, sco era la pasternaria a Vella. L’idea da la cooperativa è da porscher stizuns dal vitg, ma er da promover products regiunals. Perquai è naschida avant radund dus onns l’idea da promover ina stizun per tuts che porscha plaz per ils products regiunals, sco era per tut igl auter, ed er en moda e maniera digitalisada. L’idea è uschia da spargnar custs da persunal, ma er en general custs. Uschia vesa il sistem tge products che mancan, pia vegnian cumprads e po uschia gist empustar quels e las vendidras ch’èn mintgamai in tschert temp en stizun pon alura metter tut en il dretg lieu, di Gianfranco Soller, il mainaproject.
Access cun ina charta da banca
La stizun saja concepida uschia che l’access saja pussaivel cun ina charta da banca, uschiglio na vegnian naginas datas rimnadas. La clienta ni il client entria en stizun e paja simplamain a las cassas ils products cun questa charta, di Gianfranco Soller. En cas da dubis possian ins consultar las cameras installadas, ma quels maletgs vegnian era regularmain stizzads. Per persunas che na veglian betg cumprar cun lur charta da banca, u na possedian betg ina, saja pussaivel da sa registrar e chargiar si normal daners, questas chartas possian ins retrair il temp che la stizun è occupada, declera Gianfranco Soller.
Idea è da promover products regiunals
Propi innovativ saja la collavuraziun cun tut ils producents regiunals. Quels enconuschian els tuts persunalmain ed ils products vegnian era promovids e plazzads a moda prominenta en stizun. Cun al plattafurma che vegn alura lantschada l'avrigl vegnian els a pudair porscher ina plattafurma a tuts ed uschia cuntanscher dapli clientella, quai saja almain la finamira, di Gianfranco Soller. La stizun duai vegnir averta la sonda ils 18 da mars ed el sa legra fitg che l’idea vegnia finalmain realitad, pertge els lavurian uss plirs onns vi da quai, di Soller che finescha il mument ses studi da marketing a Winterthur.
Daners duajan era vegnir da l’agid da muntogna
Els hajan dumandà pliras fundaziuns ed instituziuns per sustegn, perquai che l’entir project custa radund in mez milliun francs. Il chantun è vegni dumandà per sustegn finanzial ma era l’agid da muntogna hajan ins dumandà ed els quintian cun il sustegn, ma fin uss n’hajan els anc betg la conferma, di Gianfranco Soller. Il mument vegnian els sustegnids da la fundaziun Linsi che prefinanzieschia ina gronda part dals daners.
