Siglir tar il cuntegn

Header

cuntegn

Casti Ils Stgiers fan paun gia en la terza generaziun

Las Svizras ed ils Svizzers mangian en media mintga di trais talgias paun, u bun 50 kilos ad onn. In che guarda ch’il paun dal mintgadi vegn sin maisa, è Claudio Stgier ch’ha diversas filialas en il Grischun, e producescha en Val d’Alvra. RTR ha fatg ina visita tar il pasterner da 53 onns da Casti.

Ils Stgiers da Casti fan dapi il 1930 paun, Claudio Stgier en la terza generaziun. Cun buna qualitad e spezialitads regiunalas ha el tgirà la tradiziun da bab e tat. El ha dentant er engrondì pass per pass e filiala per filiala ses manaschi.

Claudio Stgier è dapi las 02:30 en ses manaschi. Durant la damaun ha el fatg differentas sorts paun, paunets e paunins. Per nus ha Claudio Stgier dentant anc fatg in paun spezial. Quai per mussar vi d'in exempel concret tut il process dal far paun. Quest «paun RTR» ha ina furma da triangul – simbolic per las trais grondas regiuns rumantschas, Engiadina / Val Müstair, Grischun Central / Sutselva e la Surselva.

Spelta, furment, seghel

Actualmain ha la furnaria Stgier atgnas filialas a Casti, Savognin, Valbella ed a Lai en in kiosc. En quellas vegnan vendidas var diesch sorts paun. La selecziun na saja aposta betg memia gronda, manegia il furner. Uschiglio surdumondia el ses clients. En il trend è per il mument paun senza gluten. Quai na sappia Claudio Stgier dentant betg producir.

L’interpresa ha radund 20 emploiads. Per garantir il futur dal manaschi è Claudio Stgier gia dapi intgin temp sin la tschertga d’ina successura u in successur che surpigliass ses manaschi. Ma enfin oz n’ha el betg anc gì success cun sia tschertga.

RR actualitad 06:00