La summa deriva da las reservas da la URGC, per trais onns datti mintgamai ina summa da 2'000 francs. Sco quai che la URCG ha argumentà, chaschunia la Revista digl noss Sulom mintg’onn in deficit da 10'000 francs. Perquai saja ins led da quest sustegn, hai gì num. A la radunanza è era vegnì approvà il quint dal 2025. Quel serra cun in minus da radund 1'400 francs tar expensas da circa 183'000 francs.
La raschun per il pitschen minus è ina contribuziun da 20'000 francs che la URCG ha pajà il 2025 a la Fundaziun da medias Rumantschas FMR. En il preventiv n’era questa summa betg anc budgetada.
Naginas novas schurnalistas e schurnalists dal Surmeir
Occupar plazzas da redacturas e redacturs en la regiun da Surmeir ed en general en territoris rumantschs restia plinavant ina sfida. I dettia ina mancanza da persunal qualifitgà, medias sajan en ina crisa ed il svilup demografic chaschunia che blera glieud giuvna bandunia la regiun.
La Fundaziun da medias Rumantschas FMR emprovia da schliar quests problems cun flexibilitad en l'organisaziun dal persunal cun engaschar era collavuraturs d'autras regiuns u collavuraturs libers externs, sco David Truttmann, schefredactur FMR, ha declerà.
La Pagina da Surmeir ha damain che 1'000 abunentas ed abunents
In auter tema central è la sminuziun dal dumber d'abunents ed abunentas da la Pagina da Surmeir. Quella haja entant sutpassà la marca critica da 1'000 persunas, quai che pudess chaschunar custs da spediziun pli auts. Raschuns principalas per desditgas èn tenor Leo Thomann, il president da l'URS, memia bler rumantsch grischun sin la Pagina da Surmeir ed er temas che na pertutgian betg la regiun. Quai sajan resuns frequents.
Leo Thomann ha dentant fatg in’analisa. «Jau hai tar differentas 'Paginas' constatà ch’igl è circa duas terzas surmiran ed ina terza rumantsch grischun, pero betg tar mintga 'Pagina' èsi medem, quai è cler, i dependa tgi che scriva ils artitgels, ed era quants ch’igl è pussaivel da translatar. Ma igl è franc uschia che la gronda part dals artitgels è scritta en surmiran».
Il diever dal program nov da translaziun «Alas» vegn vesì sco sustegn pussaivel per publitgar dapli texts en l'idiom surmiran, i dovria però vinavant ina correctura d’ina persuna che discurria surmiran.