La discussiun dad ina gasetta bilingua datti gia dapi intgins onns. Sin maisa era l'idea d'ina gasetta in trais parts: ina part rumantscha, ina part tudestga, ed il fegl uffizial per tut las vischnancas. Quai fiss dentant be vegnì en dumonda, sche tut las vischnancas da la regiun Alvra avessan sustegnì ella. Cun quai che Surses e Vaz – las pli grondas vischnancas en la regiun – na sustegnan betg ella, è la «maridaglia» giud maisa. La pagina da Surmeir cumparia vinavant sco usità, mintga gievgia.
Motivs finanzials e politics
Las vischnancas avessan surpiglià 49 francs da mintga abunament, e furnì la gasetta en tut las chasada. La chargia finanziala saja stà in dals motivs per refusar la fusiun, di Mirko Pianta, manader da la regiun Alvra. In auter motiv eran ponderaziuns da politica a lingua. I haja dà temas che las part rumantschas pudessan ir a perder. En las vischnancas dettia plinavant differentas constellaziuns linguisticas – Vaz cun ina maioritad tudestga, Surses cun ina maioritad rumantscha. Quai fetschia pli difficil da chattar ina schliaziun.
Sco che Mirko Pianta di dentant er envers FMR: Il project actual saja giud maisa. I possia dentant esser ch'ins sto en intgins onns puspè examinar in nov project dad ina gasetta regiunala.
Or da l'archiv