La gasetta emnila Pagina da Surmeir vuless ir ina via bilingua. L'editura Uniun Rumantscha da Surmeir URS, aveva infurmà schon pli baud davart quella opziun. Cun la gasetta Novitats da Lai Planiras cun l'editura Südostschweiz fiss er pronta ina spusa. Decider stuessan er las vischnancas da la regiun Albula/Alvra che sajan infurmadas, ha il president da l'URS Gian Sonder ditg envers RTR.
Ina soluziun bilingua cun la gasetta Novitats fiss in pitschen pass enavant. In'idea fiss che las vischnancas sa participassan finanzialmain vi dals abunaments, e la part fegl uffizial fiss integrada. Mintga abitant profitass. Ils represchentants da las vischnancas hajan uss sin maisa ina basa da discussiun.
Gian Sonder ha ditg a chaschun da la radunanza generala da l'URS ch'ins saja fitg cuntent cun la lavur da la Fundaziun Medias Rumantscha FMR. Quella è dapi trais onns responsabla per la redacziun da la Pagina. L'URS è mo pli responsabla per la stampa, la spediziun e la reclama da la gasetta. Ella scriva dapi la midada perfin in pitschen gudogn – l'onn passà radund 40'000 francs.
Naginas consequenzas per FMR
Betg pertutgada da las midadas fiss la redacziun: La Fundaziun Medias Rumantschas FMR procura per ils artitgels schurnalistics da la «Pagina da Surmeir». David Truttmann, il schefredactur da la FMR ha confermà sin dumonda d'avair enconuschientscha dal nov model.
Els hajan anc singulas dumondas. Lur incumbensa saja da distribuir texts schurnalistics rumantschs. Il contract da cunvegna cun l'URS valia enfin il 2025 e stuess allura vegnir prolungà u negozià da nov.
