Duai la gasetta «Pagina da Surmeir» vegnir bilingua? L'editura Uniun Rumantscha da Surmeir URS, aveva infurmà en l'ediziun actuala davart quella opziun. La balla saja ussa tar la politica da la regiun Albula/Alvra, ha il president Gian Sonder ditg envers RTR.
Ed ina soluziun bilingua cun la gasetta «Novitats» fiss in pitschen pass enavant. Ina idea fiss che las vischnancas sa participassan finanzialmain vi dals abunaments, e la part fegl uffizial fiss integrà. Mintga abitant profitass. Ils represchentants hajan ussa sin maisa ina basa da discussiun.
Gian Sonder ha ditg vinavant ch'ins saja fitg cuntent cun la lavur da la Fundaziun Medias Rumantscha FMR. Quella è dapi dus onns responsabla per la redacziun da la Pagina. L'URS è mo pli responsabla per la stampa, la spediziun e la reclama da la gasetta. Ella scriva dapi perfin in pitschen gudogn.
Proposta bilingua
Ils texts rumantschs pudessan cumparair en la gasetta tudestga «Novitats». Quella cumpara en la regiun Lai-Valbella, Vaz, Filisur, Bravuogn ed Alvra. Ina idea saja da far sco la gasetta «Chatschader Grischun Bündner Jäger» cun mintgamai ina part rumantscha ed ina tudestga.
Quai sajan dentant mo ideas, uschia Sonder. L'examinaziuns cun la Somedia ch’edescha las «Novitats» hajan mussà, ch’ina collavuraziun saja pussibla, i sajan dentant anc da sclerir diversas dumondas.
Naginas consequenzas per FMR
Betg pertutgada da las midadas fiss la redacziun: La Fundaziun Medias Rumantschas FMR procura per ils artitgels schurnalistics da la «Pagina da Surmeir». David Truttmann, il schefredactur da la FMR ha confermà sin dumonda d'avair enconuschientscha dal nov model.
Els hajan anc singulas dumondas. Lur incumbensa saja da distribuir texts schurnalistics rumantschs. Il contract da cunvegna valia enfin il 2025 e stuess allura vegnir prolungà u negozià da nov.
