Claudia Husmann remplazza sco directura Christine Demarmels che va en pensiun la fin da l'onn. Ella saja sa vivida en bain en sia nova rolla, ha ella ditg. Ella haja emprendì ad enconuscher bler persunal motivà. Quai saja la basa per avair success.
Jau sun fitg cuntenta, surtut perquai che jau sun fruntada sin enorm bleras collavuraturas e collavuraturs motivads. Quai è decisiv per la qualitad da la purschida.
Per ella saja impurtant da pudair guardar cun il cussegl d’administraziun, tge purschidas ch’ins veglia porscher en l’avegnir. Nagin tema saja actualmain la fusiun cun l'ospital da Tusaun, che vegn discutada gia dapi plirs onns. Perquai che Tusaun saja il mument vi d’ina reorganisaziun, na saja il mument betg il dretg temp da discutar sur d’ina fusiun.
Gia ditg en la regiun
Claudia Husmann è stada ils davos 13 onns manadra da l'uniun da persunal da tgira da la secziun Svizra centrala. La dunna da Lucerna ha fatg l'emprendissadi en il sectur da la tgira ed è suenter ida la via academica. Husmann ha studegià scienzas politicas a l'Universitad da Lucerna ed ha in «Master of Business Administration».
Sin dumonda dad RTR ha la dunna da 56 onns ditg che la midada saja stada in giavisch dad ella e ses partenari, per ina nova regiun geografica e la sfida professiunala. «Lavurar en il Grischun, en ina regiun averta e far ussa vacanzas a Lucerna», quai saja in model forsa betg usità, dentant il plan per ils proxims onns. Ella saja in persuna che planiseschia en fasas da pli u main 10 onns.
Husmann viva enfin ussa cun ses partenari en la citad da Lucerna. Ella ha ditg da vulair tegnair in pe a Lucerna, i saja dentant cler ch'ella tschertga insatge d'abitar en la regiun.