Siglir tar il cuntegn

Header

audio
Center da sanadad Savognin: Spital tschertga nova direcziun
Or da Actualitad dals 18.01.2023. Maletg: RTR
laschar ir. Durada: 3 minutas 9 Secundas.
cuntegn

Center da sanadad Savognin Spital tschertga nova direcziun

La fin da l'onn va la directura dal center da sanadad Savognin en pensiun. La plazza è gia publitgada per avair avunda temp per la recrutaziun e per la surdada.

Il center da sanadad Savognin è cun 120 plazzas da lavur il grond patrun da Surses ed è impurtant per la vita sociala e l'economia publica da la regiun. Ils onns passads è ina collavuraziun stretga cun il spital regiunal Tusaun adina puspè vegnì tematisà, schizunt ina fusiun pussaivla era ina varianta.

Cun la pensiun da la directura savess ussa il tema da la fusiun puspè esser sin maisa. «Na», di Peder Cathomen, president dal cussegl d'aministraziun: «nus tschertgain in directur u ina directura e betg insatgi che maina ina filiala». Ina collavoraziun ed er models da sinergia sajan dentant natiralmain da persequitar vinavant, cunquai che diversas sfidas spetgan ils proxims onns en il sectur da sanadad.

Peder Cathomen
Legenda: Peder Cathomen, Center da sanadad Savognin. Toni Poltera
Ideal fiss in media u ina media, cun scolaziun economica ed il dun da manar persunas
Autur: Peder Cathomen Center da sanadad Savognin

Peder Cathomen è persvas da chattar la dretga persuna per il Center da sanadad Savognin. En il chantun Son Gagl vegnan serrads divers spitals, in center da sanadad da la grondezza da Savognin saja attractiv per metter spertamain en moviment insatge e la regiun Surses saja attractiva per persunas cun interess da sport e cultura, uschia Cathomen. «Ideal fiss in media u ina media, cun scolaziun economica ed il dun da manar persunas», resumescha il president dal cussegl d'administraziun il profil d'ina directura futura u d'in directur futur. Cun avair avunda temp da recrutaziun saja el da buna speranza da chattar la persuna ideala per la direcziun dal Center da sanadad Savognin.

RTR actualitad 12:00

Artitgels legids il pli savens

Scrollar a sanestra Scrollar a dretga