Per pudair preschentar ina schliaziun persistenta haja mintgin fatg sia contribuziun, ha il president dal cussegl d'administraziun da la Center da Sanadad Savognin SA, Luzi Thomann, ditg. Vul dir: Il persunal, il cussegl d'administraziun, la gruppa d'interess e la suprastanza communala èn stads involvids stretgamain en il process. Sco er il comité d'iniziativa che ha pretendì ina lescha communala che garantescha in provediment da sanadad ed il sustegn finanzial correspundent. En il rom d'in inscunter l'october saja gartegià da vegnir sin in curs cuminaivel.
Fitg impurtant è che nus avain sa chattà e vain uss pudì cuntinuar cun Ina vusch.
Tenor il president communal Daniel Wasescha saja quai stà in punct decisiv. I sajan stads pitschens detagls ch'ins na saja betg stà perina – pia betg chaussas fundamentalas. Però quella saira saja propi stada fitg buna, tuts hajan fatg in pass.
Ussa tiran pia tuts vi da la medema suga – ed er en la medema direcziun. Per la vischnanca da Surses munta quai ch'ins possia probablamain tegnair il center da sanadad Savognin en la furma sco quai ch'el è ussa, pia cun la purschida existenta. La consequenza è ch'i custia insatge.
Cunvegna da prestaziun vegn elavurada
La cunvegna da prestaziun che dess valair fin il 2032 vegn ussa elavurada en detagl e cuntegna: in spital, ina pratga da medi, ina chasa d'attempads e da tgira ed abitaziuns cun service. La contribuziun annuala da la vischnanca vegn a muntar in mez milliun francs. Dentant, sche la liquiditad dal center da sanadad cuntanscha ina summa da 2,5 milliuns, alura scroda la contribuziun da la vischnanca per l'onn suandant.
Il manaschi dess cuntinuar sco fin ussa. L'iniziativa ch'è vegnida l'onn passà cun prest 500 suttascripziuns è anc sin maisa. Da vart dal comité d'iniziativa ha Guido Luzio dentant ditg suenter la saira d'infurmaziun che quella vegnia retratga uschè prest sco il pievel haja decis. I dat pia glisch verda da tuttas varts. L'ultim pled en chaussa han dentant ils da Surses. La votaziun è planisada per ils 23 da favrer 2026.
