Davent da l’atun passà han ils musicists e las musicistas da la MiMS trenà mordio per lur concert annual – ch'il tuni alura er sco quai ch'il s'auda la sera dal concert. Saja quai mintgin e mintgina per sasez a chasa, en ils differents registers u tuts ensemen. Quest onn suna la MiMS l'emprima giada sut la batgetta dal nov dirigent Hanspeter Bircher. Ils musicists èn cuntents cul nov dirigent. El decleria bain, fetschia sunar bler els ed ellas e haja blera pazienza. E pazienza para dad esser in punct impurtant.
Nus discurrin bler tranteren e là dovra il dirigent schon in zic pazienza cun nus.
Er il dirigent Hanspeter Bircher è cuntent cun ils musicists e las musicistas. L'entschatta hajan els schon baterlà in zic bler, ma durant las provas sajan els fitg concentrads.
I program da quest onn è fitg variant – nus faschain in viadi enturn il mund.
Tranter auter datti d'udir tempra da la Scozia e l'Irlanda, ritmus spagnols, tempra taliana, blues e tango. E forsa datti er anc in u l'auter intermezzo spezial sco surpraisa. Sch'i va per la dumonda sch'ils tocs sajan uss pli grevs u pli levs che auters onns n'èn ils musicists e las musicistas betg perina. Ils ins din ch'ils tocs sajan pli simpels d'emprender che auters onns, ils auters din ch'i saja pli pretensius. Mo sch'i va per la saira dal concert èn els ed ellas perina: Tuts che sa legran sin la saira dal concert.
Jau hai la speranza ch'il concert plascha a nus ed er al public.
Saja quai pervia dal sunar ensemen, pervia dals tocs che plain ubain er sin la festa ed il star da cumpagnia suenter il concert. Ed insatge e clar, senza il «Marsch San Carlo» dad Oscar Tschuor va en Val Schons insumma nagut. Quel toc sa probabel mintgin e mintgina da la MiMS sunar en sien. Quel toc dastga pa en nagin cas mancar.
