Concert intercultural - Musica da tut il mund durant ina saira

Durant la saira arrivan enturn 200 visitaders e visitadras. Grond e pitschen sa radunan en la gronda halla da la localitad d'eveniment «Fabrik» a Cuira e tschernan ina plazza per far cumadaivel. Dapertut audan ins persunas che discurran differentas linguas e paran d'esser fitg cuntentas. Il concert cumenza cun la chanzun «The show must go on» d'ina band che sa cumpona da persunas da divers pajais – persunas da la Svizra, l'Ucraina e da la Siria.

Durant il concert audan ins musica da tuttas culturas – musica curda, rap englais, musica d'ina chantadura ucranaisa, musica rumantscha e schizunt musica da guggas. Ed en quest repertori musical fitg divers sa chatta er adina puspè ina u l'autra chanzun da Nada.

Impressiuns da la saira

Tranter mintga preschentaziun vegn in um sin la tribuna per annunziar ils proxims artists u las proximas artistas. Quai um è Noel Patscheider, il president da la nov'uniun interculturala da Cuira. Avant in onn ha el fatg ses servetsch civil en la chasa d'asil. Là ha el cumenzà a mussar ad uffants e creschids co sunar differents instruments.

Uschia saja lura vegnida l'idea d'organisar questa saira interculturala, nua che persunas da tuttas culturas e derivanzas pon preschentar lur musica.

Scuntradas culinaricas

Ultra da la musica ha il concert era purschì eveniments culinarics. Pliras famiglias han preschentà tratgas tipicas da lur cultura ed han uschia contribuì a la diversitad culturala da la saira.