La populaziun da Sur, Mulegns e Marmorera en la Val Surses ha survegnì l'emna passada nauschas novas. La butia a Sur serra cun la fin december 2025 sias portas, da quai rapporta la FMR. En la brev a la populaziun èsi da leger ch'i na saja a lunga vista betg pussaivel da segirar in manaschi economic da la butia, quai malgrà ch'igl ha dà sustegn da la vischnanca da Surses.
Grondas differenzas en las filialas
Las filialas a Casti (Top Shop cun tancadi) ed il Volg a Lantsch èn las filialas che marschan il pli bain. Ellas han fatg ina svieuta annuala il 2024 da mintgamai passa dus milliuns francs. Cuntrari a quai cuntanschan las butias pli pitschnas sco quella da Sur en Surses ed a Stierva en Val d’Alvra bler pli pauc, per part sut 300'000 francs ad onn. Mo grazia a las subvenziuns communalas pon ellas anc surviver.
Roman Brenn, il president dal consum Alvra-Surses vesa ina soluziun pussibla en collavuraziun cun autras societads cooperativas per avair ina vusch pli ferma, ha el ditg. Sco mesira per sbassar ils custs dettia era l’opziun dad automatisar butias pitschnas. Quellas pudessan augmentar la svieuta cun in engaschament da persunal reducì e cun temps d'avertura pli lungs.
Ma la Fenaco che testeschia gia ina tala butia na fetschia betg vinavant. Perquai na possian ins il mument betg anc communitgar dapli. Sch’i dettia era en tschintg onns anc medem bleras butias – il mument èn quai set – n'ha Brenn betg pudì communitgar il fanadur. La Consum Alvra-Surses maina butias a Riom, Lantsch, Alvagni, Bivio, Stierva, Sur e Casti.
