Las filialas a Casti (Top Shop cun tancadi) ed il Volg a Lantsch èn las filialas che marschan il pli bain. Ellas han fatg ina svieuta annuala da mintgamai passa dus milliuns francs. Cuntrari a quai cuntanschan las butias pli pitschnas sco quella da Sur en Surses ed a Stierva en Val d’Alvra bler pli pauc, per part sut 300'000 francs ad onn. Mo grazia a las subvenziuns communalas pon ellas anc surviver.
Roman Brenn, il president dal consum Alvra-Surses vesa ina soluziun pussibla en collavuraziun cun autras societads cooperativas per avair ina vusch pli ferma, ha el ditg. Sco mesira per sbassar ils custs dettia era l’opziun dad automatisar butias pitschnas. Quellas pudessan augmentar la svieuta cun in engaschament da persunal reducì e cun temps d'avertura pli lungs.
Ma la Fenaco che testeschia gia ina tala butia na fetschia betg vinavant. Perquai na possian ins il mument betg anc communitgar dapli. Sch’i dettia era en tschintg onns anc medem bleras butias – il mument èn quai set – na po Brenn betg communitgar. La Consum Alvra-Surses maina butias a Riom, Lantsch, Alvagni, Bivio, Stierva, Sur e Casti.
