Gia dapli che 20 onns maina Herbert Michael in affar da taxi. Suenter sia scolaziun da pur ha el midà professiun. 10 onns gieva el tras l’Italia e la Germania cun il camiun, e suenter ha el decidì da fundar in affar da taxi. Cun quel fa el transports da persunas, da valischs, e plinavant accumpogna el era transports spezials da camiuns cun dimensiuns pli grondas che lubidas. Durant la stad fa Herbert Michael, che vegn numnà da tuts Herbie, era viadis cun il Bus Alpin Beverin al pe da la Tguma da Tumpriv, ed era sin l’Alp Nurdagn. En tut ha Herbie quatter vehichels: Trais bus cun otg, 20 e 30 plaz, sco era in auto per accumpagnar transports grevs.
-
Bild 1 von 10. Herbert Michael porta las valischas dals viandants da la Via Spluga en il Hotel Bodenhaus a Spleia. Bildquelle: RTR.
-
Bild 2 von 10. Herbert Michael fa era transports da pachets per in'interpresa privata. Bildquelle: RTR.
-
Bild 3 von 10. Pachets e valischas ston vegnir repartidas. Bildquelle: RTR.
-
Bild 4 von 10. Vista sin Montespluga. Bildquelle: RTR.
-
Bild 5 von 10. Herbert Michael durant ina pausa a Montespluga. Bildquelle: RTR.
-
Bild 6 von 10. Sin viadi en Valchiavenna. Bildquelle: RTR.
-
Bild 7 von 10. Herbert Michael è arrivà cun las valischas ad Isola (Madesimo). Bildquelle: RTR.
-
Bild 8 von 10. Isola (vischnanca da Madesimo). Bildquelle: RTR.
-
Bild 9 von 10. Sin il Pass dal Spleia. Bildquelle: RTR.
-
Bild 10 von 10. Ad Isola finescha il viadi dal taxi Herbie. Bildquelle: RTR.
RTR accumpogna Herbert Michael tar in viadi cun valischs per persunas che fan la Via Spleia. I va en direcziun Italia, enfin ad Isola.
«Tar mai duai la clientella sa sentir bain»
Avant dus onns ha Ruedi Schaller oriund da Donat sa fatg independent sco taxist. I tanschia per viver, ma la fin dal mais na restia betg bler per metter da la vart e spargnar. Per Ruedi Schaller n'è ir cun taxi dentant betg mo professiun mabain era passiun.
Per sa far independent dovri chapital ed investiziuns. Uschia ha Ruedi Schaller avant dus onns duvrà sia cassa da pensiun per pudair cumprar in auto e laschar bajegiar enturn quel sco taxi. Mo cun quai n'eri dentant anc betg fatg. L'entschatta haja el duvrà insatgi ch'haja pudì dir ad el tgeninas segiradas ch'el dovria per che tut saja propi correct. In'ulteriura sfida: per ils manischunzs da taxi valan las medemas perscripziuns sco per quels che van cun camiun. Er in taxi sto avair in tachograf che registrescha tut ils viadis ed er ils taxists ston respectar il temp da paus. En ina regiun periferica sco Tusaun, nua che Ruedi Schaller viva, saja la dumonda per in taxi surtut durant l'emna betg fitg gronda. Passa la mesadad da ses gudogn fetschia el las fins d'emna cun manar a chasa persunas ch'èn stadas en sortida.
La passiun per ir cun taxi
Per Ruedi Schaller èsi impurtant che sia clientella sa senta bain tar el en il taxi. Uschia guardia el ch'i saja adina schuber e gidia a clients e clientas pli passadas a purtar las tastgas cun lur cumpras en abitaziun. Quai che saja per el il pli bel vi da sia lavur sajan ils inscunters cun la glieud e la communicaziun.
En il taxi raquinta la glieud tut quai ch'els han gist sin il cor.
Sco manischunz da taxi sajan ins psichiater, cussegliader da lètg e medi, tut en ina. Per el saja cler: Quai che vegn raschunà en il taxi, resta en il taxi. El vegnia enturn per l'entira Svizra e sur ils cunfins ora. Ed era datiers da dachasa saja el cun ses taxi gia arrivà a lieus nua ch'el na saja anc mai stà, e qua fetschia grond plaschair.
Entradas fixas
L'onn passà ha Ruedi Schaller gì la chaschun da surpigliar in pitschen pensum fix per il transport da scolars a Cuira. Uschia ch'il bab da famiglia ha silmain pudì generar ina pitschna part entradas fixas. Suenter dus onns sur sasez po el augmentar ses pensum fix sin l'entschetta da l'onn da scola quest atun. Il telefonin da Ruedi Schaller n'è pia betg pli activ durant 15 uras il di, 6 dis da l'emna, e tuttina: Il «Taxi Schaller» vegnia vinavant ad esser a disposiziun. Dentant mo la sonda, durant las vacanzas da scola e sin empustaziun in pèr dis ordavant.