Il campadi «Gravas» sin il territori da la vischanca da Vaz po vegnir engrondì. La Regenza grischuna ha dà glisch verda a la revisiun parziala da la planisaziun locala, scriva il chantun. Perquai che la situaziun d'auas e privels è vegnida giuditgada da nov ha il campadi pers 27 plazs. Quels sa chattan da nov en las zonas da privel 1 e 2 e na pon betg pli vegnir utilisads per campar. Cun l'engrondiment duai questa perdita vegnir cumpensada uschia ch'i stattan a disposiziun suenter totalmain bun 126 plazs.
Dasper l'engrondiment dal campadi duai er dar in nov bajetg da manaschi e d'infrastructura. En consequenza da l'engrondiment sto er la loipa vegnir spustada. Perquai sto vegnir construida ina nova punt. Quella duai però mintgamai vegnir demontada suenter la fin da la stagiun.
