Ela Energiewelt - Uniun activa en il Grischun vegn schliada

Prestaziuns da cussegliaziuns en il sectur da la construcziun effizienta vegnian surpigliadas oz pli e pli da purschiders orientads a l'economia, uschia che l'incumbensa oriunda da l'uniun saja per gronda part ademplida, scriva l’uniun en ina communicaziun.

Divers merits a favur da l'ambient

Patric Vincenz, il manader partent da la “ela eenergiewelt” ch'ha accumpagnà l'uniun dapi sia fundaziun guarda enavos sin in temp da success. En spezial la sensibilisaziun da la publicitad per dumondas d'energia e la promoziun da la mobilitad electrica accentuescha el. «Per nus gira tut anc adina enturn ina dumonda fundamentala: Co pudain nus intimar la publicitad da sa fatschentar cun ils problems d'energia?» Questa dumonda saja francada oz pli che mai en ils chaus da la glieud, l'interess per quests temas saja fitg grond. In success spezial è tenor Vinzens stà in'occurrenza davart l'electromobilitad a Savognin, nua che passa 500 interessads èn vegnids ensemen, e quai cun divers acturs – davent da garaschists enfin producents da fotovoltaica. Er l'installaziun da staziuns da chargiar autos electrics en differents lieus quinta el tar ils merits centrals da l'uniun.

Fundaziun Pignaverde vegn sustegnida

La facultad restanta da l'uniun vegn per entant transferida en la Fundaziun Pignaverde. Là duain vegnir promovids en stretga collavuraziun cun l'uniun «Parc Ela» projects en connex cun il guaud da muntogna. Quai duai contribuir a l'utilisaziun persistenta ed a la protecziun da resursas regiunalas. Patric Vincenz giavischa per l'avegnir che la persistenza na restia betg mo in slogan, mabain vegnia era vivida.