Siglir tar il cuntegn

Header

video
Peter Nadig fa renfatschas a la vischnanca da Lantsch
Or da Telesguard dals 28.09.2021.
laschar ir
cuntegn

Elecziuns a Lantsch Peter Nadig crititgescha la vischnanca

La vischnanca da Lantsch n'haja betg infurmà correct avant las elecziuns communalas da la dumengia passada. Quai pretenda Peter Nadig ch'ha candidà per il presidi, ma ha pers.

Peter Nadig crititgescha che ses num na saja betg vegnì publitgà en la brev per las elecziuns ch’è vegnida tramessa a tut las chasadas. Che la vischnanca haja publitgà mo ils nums dals titulars en uffizi che candideschan danovamain, na saja betg endretg. Betg tuts guardian anc sin l’internet u en il fegl uffizial, e quai haja custà ad el vuschs, ha ditg Peter Nadig envers RTR. Pass giuridics na veglia el dentant betg prender.

audio
Lantsch: Rinfatschas da Nadig tar elecziuns communalas
04:05 min, Actualitad dals 28.09.2021.
laschar ir. Durada: 04:05 minutas.

Tut tenor la constituziun 

Simon Willi, il president communal reelegì è da l’avis che tut saja stà confurm a la constituziun da la vischnanca, ins haja publitgà tut correct. Tuttina accepta Willi la critica: Tar las proximas elecziuns veglia la vischnanca da Lantsch infurmar meglier, tgi che candidescha.

Betg dapertut vala il medem

L'uffizi da vischnancas na prenda betg posiziun tar in cas singul. Tenor Thomas Kollegger, il manader, saja l'agir da Lantsch tenor lur constituziun, pia legal. Impurtant saja en mintga cas, che candidatas e candidats che na sajan betg cuntentas cun l'agir da la vischnanca, fetschian attent ella sin quai avant l'elecziun. En general vala: Mintga vischnanca haja d'agir tenor lur constituziun. E quella sappia variar da vischnanca tar vischnanca.

Legenda: Peter Nadig (sanester) e Simon Willi ch'è vegnì reelegì sco president communal da Lantsch. Federico Belotti

RTR novitads 17:00

Artitgels legids il pli savens

Scrollar a sanestra Scrollar a dretga