Ils 31 d’avust ha il suveran da Vaz elegì las persunas en ils gremis politics da la vischnanca. La perioda d’uffizi dura fin il 2029. Per il post dal president communal ha sulettamain il president actual, Maurin Malär, candidà. El è vegnì reelegì cun 600 vuschs. Ulteriur 195 cedels da votar eran vids, 77 eran nunvalaivels. La participaziun a l'urna muntava a var 50%.
Maurin Malär aveva surpiglià l’uffizi dad Aaron Moser l'onn 2021.
Puspè ina dunna per la suprastanza
Sa retratg da la suprastanza da Vaz è Thomas Parpan, suenter in temp d’uffizi da set onns. Beat Fausch desista suenter quatter onns en suprastanza d’ina reelecziun pussaivla.
Las suandantas persunas èn vegnidas elegidas:
- Nicole Sigron (632 vuschs, nov)
- Romano Paterlini (512, enfin qua)
- Marco Vögeli (428, nov)
- Kilian Margreth (386, enfin qua)
Cun Nicole Sigron han ils da Vaz suenter quatter onns puspè elegì ina dunna en l’executiva communala. Nominà la pura han il «Frauenstamm Lai» e l’agricultura. Sigron è stada il 2024 la presidenta dal cussegl communal.
Sis hoteliers e gastronoms
Elegì han las votantas ed ils votants da Vaz era las 15 persunas dal cussegl communal. Era per la nova perioda d’uffizi dal 2026 fin il 2029 stattan a disposiziun Roland Berther, Gian Carlo Bläsi, Edwin Candraja, Domenico Margreth, Michele Vitali e Fabian Weber. 9 sezs en il cussegl communal èn d’occupar da nov.
Dals 10 novs candidats e candidatas derivan gist sis da la branscha da l’hotellaria e da la gastronomia. Igl èn Bettina Arpagaus, Urs Auchter, Marco Parpan-Zollinger, Xenia Picco, Ralph Treuthardt e Thomas Vogt. Ils ulteriurs candidats èn Michael Hartmann, Julia Huber, Marc Schürmann e Sarah Sharp Fitzpatrick. Oramai han candidà 16 persunas per il parlament da Vaz che consista da 15 sezs.