Siglir tar il cuntegn

Elecziuns communalas Sis persunas per quatter sezs a Vaz

La fin da quest mais elegian ils votants e las votantas da la vischnanca da Vaz il president communal, la suprastanza ed il parlament. Per l’executiva ed era per il cussegl communal sa mettan a disposiziun dapli candidatas e candidats che quai ch’i ha sezs.

Ils 31 d’avust decida il suveran da Vaz, tge persunas che vegnan en ils gremis politics da la vischnanca. La perioda d’uffizi dura fin il 2029. Per il post dal president communal candidescha sulettamain Maurin Malär, ch’è dapi il 2021 al timun da Vaz. El aveva surpiglià l’uffizi dad Aaron Moser. Per la proxima perioda d’uffizi n’ha Malär nagin cuntracandidat u cuntracandidata.

Puspè ina dunna per la suprastanza?

Sa retratg da la suprastanza da Vaz è Thomas Parpan, suenter in temp d’uffizi da set onns. Beat Fausch desista suenter quatter onns en suprastanza d’ina reelecziun pussaivla.

Kilian Margreth e Romano Paterlini fan era part dapi quatter onns da l’executiva communala. Ed els candideschan per ina segunda perioda d’uffizi. Els han bunas schanzas da vegnir reelegids senza gronda fadia. Per ils dus sezs vacants èn trais candidats ed ina candidata avant maun. I sa tracta d’ina vart da Gian Carlo Bläsi, da Roberto Jäckle e da Marco Vögeli.

Da l’autra vart candidescha cun Nicole Sigron er ina dunna per la suprastanza. Ella è stada il 2024 la presidenta dal cussegl communal. Cun Sigron avessan ils da Vaz suenter quatter onns puspè la pussaivladad d’eleger ina dunna en l’executiva communala. Nominà la pura han il «Frauenstamm Lai» e l’agricultura.

Sis hoteliers e gastronoms

D’eleger han las votantas ed ils votants da Vaz era las 15 persunas dal cussegl communal. Era per la nova perioda d’uffizi dal 2026 fin il 2029 stattan a disposiziun Roland Berther, Gian Carlo Bläsi, Edwin Candraja, Domenico Margreth, Michele Vitali e Fabian Weber. 9 sezs en il cussegl communal èn d’occupar da nov.

Dals 10 novs candidats e candidatas derivan gist sis da la branscha da l’hotellaria e da la gastronomia. Igl èn Bettina Arpagaus, Urs Auchter, Marco Parpan-Zollinger, Xenia Picco, Ralph Treuthardt e Thomas Vogt. Ils ulteriurs candidats èn Michael Hartmann, Julia Huber, Marc Schürmann e Sarah Sharp Fitzpatrick. Oramai candideschan 16 persunas per il parlament da Vaz che consista da 15 sezs.

RTR actualitad 12:00

Artitgels legids il pli savens