Furnir dapli chalira fatga cun laina regenerabla indigena – quai vesan tant la suprastanza sco era il suveran d’Andeer sco schanza per l’avegnir. Quai tranter auter per daventar pli ecologic, per vegnir pli independent d’imports d’ieli e per nizzegiar dapli lain dals agens guauds.
Stgaudament existent è vegl
Il stgaudament da zinslas a distanza actual d’Andeer è vegnì en ils onns. Per pudair manar vinavant duvrass el in filter per pulvra fina ed in nov deposit che correspunda a la lescha actuala. Perquai che la Via Granda vegn sanada ils proxims onns, vul la vischnanca nizzegiar sinergias ed installar lingias novas da chalira a distanza.
Suenter il Gea da la radunanza communala vul la vischnanca d’Andeer ussa incumbensar ina firma da sviluppar in concept concret. Sco ch’igl è vegnì infurmà a la radunanza communala, saja quai la firma Recal SA da Mustér. Ella haja gia fabritgà stgaudaments a distanza a Mustér, a Val sco era a Breil. Tenor ina retschertga ch’è gia vegnida fatga saja l’interess da la populaziun uschè grond ch’il stgaudament cun chalira a distanza possia vegnir manà rentabel.
Parcadis ad Andeer restan gratuits
Plinavant ha il suveran d’Andeer refusà ina dumonda da reponderar il concept da parcar. Quel aveva la radunanza communala refusà ils 26 da november da l’onn passà. Il concept resta pia en il truclet.
Lavurs da drenascha e quint annual
Per finir las lavurs da la drenascha dals abitadis – in project ch’è vegnì lantschà l’onn 2000 – ha la radunanza communala approvà in credit da 155’000 francs.
Plinavant è vegnì approvà il quint da l’onn 2021. El serra cun in plus da radund 88'000 francs. Quai tar investiziuns nettas da stgars 1,3 milliuns francs.
