Per far accessibel il guaud da Surses per maschinas da selvicultura grevas datti dapli infrastructura. Il chantun vegn a sustegnair quai cun 2,77 milliuns francs, ha el annunzià. En tut custia il project 3,6 milliuns francs.
Aifer trais onns duai vegnir bajegià ina nova punt sur il Gelgia tar la resgia a Tinizong. La punt veglia vegn spazzada ed i dat ina nova via dad 1,6 km lunghezza davent da la nova punt fin tar la veglia resgia da Savognin en il territori Sur Sarons.
Il territori sur Surses è vegnì taxà sco «territori prioritar d'accessar cun potenzial d'optimisaziun» en il plan da svilup dal guad en la regiun Grischun Central e Moesano. L'infrastructura existenta na lubescha betg da nizzegiar maschinas novas, pli grevas e pli effizientas per la racolta da laina. Plinavant passan – cun la situaziun actuala – ina gronda part dals transports da laina ord quest territori tras il vitg da Savognin.
