Sin il mir da fermada vegnan il mument installads 1'056 panels solars. Il settember duessan quels ir vi da la rait e producir 380 uras megawat forza electrica ad onn. Quai tanscha per il diever da radund 160 chasadas e custa 800'000 francs.
I sa tracta d’ina collavuraziun cun las Ovras idraulicas Rain Posteriur KHR, che possedan il lai da fermada. Il mir sa chatta sin territori svizzer, il lai sez tutga tar l’Italia.
Lavurs van tenor plan
Sco quai che las Ovras idraulicas da Turitg han infurmà ad in inscunter cun las medias, s’avanzian las lavurs tenor plan. Las lavurs hajan cumenzà l'entschatta da fanadur ed il settember duess l'ovra solara gia ir vi da la rait. L’autezza da radund 1'930 meters sur mar saja fitg adattada per energia solara, perquai che la forza dal sulegl saja pli intensiva. Las reflecziuns da la naiv durant l’enviern sco era las temperaturas bassas fetschian l’ovra solara 25% pli effizienta che ovras sumegliantas giu la bassa. Quai saja ina contribuziun per dapli protecziun dal clima, e per cuntanscher la midada sin il sectur da l’energia.
