Fasa oranscha per Brinzauls - A lunga vista probabel dar si il vitg – uss visitar mintga di

• A partir da glindesdi, ils 5 da matg, vala per Brinzauls la fasa oranscha.
• Da nov pon abitantas ed abitants visitar lur chasas e bains mintga di da las 09:00 a las 19:00 – sche la situaziun da segirezza tar la bova lubescha quai.
• Il scumond d'entrar en il vitg per la zona periclitada resta.
• Plans da dischlocar preventiv èn preparads per abitantas ed abitants che vulan – però era per segundindigens.
• Per l'emprima giada communitgescha il stab directiv ch'i saja era da considerar in scumond d'utilisaziun – quai che munta nagut auter che da bandunar il vitg per adina.

L'access al vitg è pussaivel mo sur il punct da controlla Belfort. Sche la situaziun da periclitaziun na permetta betg d'entrar en il vitg, lura vegnan las persunas registradas per la visita infurmadas via SMS la saira avant. Uschia mida la pratica da fin qua, ch'i vegniva tramess SMS, sche l'access al vitg era pussaivel.

L'access per l'agricultura per cultivar il terren na vegn betg midà – ils manaschis purils pon lavurar tranter las 8:00 e las 18:00 sin terren agricul era en la zona dal scumond.

Brinzauls è evacuà dapi il november 2024

Avrir la box Serrar la box

Dapi ils 17 da november 2024 è l'entira populaziun da Brinzauls evacuada. Las autoritads avevan decretà la fasa cotschna per il territori da Brinzauls, perquai che 1,2 milliuns meters cubics crappa smanatschan da glischnar da la spunda engiu e sur il vitg ora. L'emprim da matg han las autoritads proclamà la fasa oranscha.

Dapi lura viva la populaziun en dachasas provisorics ed ha pudì turnar mo sporadicamain e per curt temp en lur chasas.

Qua tar la registraziun da la saira d'infurmaziun.

Ils proxims onns smanatschan anc dapli evacuaziuns

La populaziun sto malgrà la fasa oranscha era durant ils proxims onns quintar cun evacuaziuns. Quai resulta d'ina analisa dad experts consultads. L'uschenumnada «Grava sura» possia en cas da blera plievgia u crudada da grippa adina puspè s'accelerar ed eventualmain sbalunar, ha communitgà la vischnanca Alvra. E sin questa part da la muntogna n'ha il tunnel da drenascha nagin effect. Quai che n'è era betg previs perquai che quella part da la muntogna n'ha da far nagut cun la part nua ch'il tunnel da drenascha fa sia funcziun.

Drenascha ha bain franà, però betg dapertut

La gallaria da drenascha ch'è en construcziun sut il vitg haja bain in effect, però betg dapertut tuttina. Entant che las bleras zonas glischnian ussa main spert – per part mo anc mez uschè svelt, glischnia il cumpartiment «Plateau» anc adina pli e pli spert.

Bain possian ins tras la gallaria da drenascha spetgar in effect calmant era sin il «Plateau», però midia quel il mument era sia direcziun. Perquai saja pauc calculabel. Uschia fissi era en l'avegnir adina puspè necessari d'evacuar il vitg. Quai pudessia capitar suenter dratgadas pli intensivas, però era suenter bovas pli pitschnas.

Tut en tut saja probabel ch'ins stoppia sur onns ed in decenni quintar cun evacuaziuns da Brinzauls.

In entir vitg tranter return e translocaziun

Tranter speranza e realitad vali adina d'observar las novas infurmaziuns, quant spert che la spunda glisch e quanta aua che vegn probabel giu da tschiel. Per il mument n'è in return pia betg pussaivel. Per la cuminanza dal vitg èn las visitas a chasa gia avant stadas impurtantas, quellas èn fin uss stadas pussaivlas surtut durant la fin d'emna. Durant il di pon las persunas visitar lur chasas, guardar per curtins ed animals, però era inscuntrar ils vischins en il vitg. Tenor il stab directiv èsi però en vista a futuras evacuaziuns era da ponderar, sch'ins vul viver vinavant a Brinzauls, cun quests custs e surtut cun quest squitsch e l'intschertezza.

Ussa èn elavurads plans pli rigurus per il mender cas. Plans da dischlocaziun, per il cas che Brinzauls na po betg vegnir mantegnì sco abitadi segir, ubain era per persunas che vulan bandunar Brinzauls preventivamain. Quai pertutga ils scleriments da metter a disposiziun terren a Vazerol, Casti ed Alvagnì per abitantas ed abitants che vulan ir – però era las schliaziuns giuridicas e finanzialas per realisar e cumpensar ina midada.

Uschia resta la populaziun da Brinzauls tranter confidenza e frustraziun, chapientscha e desperaziun. Per ils ins vai memia plaun cun ils plans da construir u pussibilitar acquists cumpensatorics, e per ils auters èsi il pli impurtant che las decisiuns sajan uschè transparentas e gistas sco pussaivel.

Duas famiglias han gia decis da bandunar Brinzauls

Las abitantas ed abitants da Brinzauls sa chattan en ina situaziun difficila. Suenter pliras evacuaziuns pervia da la situaziun instabila dal terren èn bleras famiglias en tschertga d'ina nova patria. Tranter quellas sa chattan era Daniel Rizzi ed Andrea Müller, che han decidì da bandunar lur chasa a Brinzauls per construir insatge nov a Vazerol.

Vazerol porscha terren da construcziun en il vest, nua che las famiglias pudessen cumenzar ina nova existenza. Ils dus abitants da Brinzauls han gronda speranza en quest project. «La malsegirtad che nus avain gist ussa, dapi november passà, è propi fitg engraviganta,» declera Daniel Rizzi. «Ed actualmain planisain nus noss futur sin basa da cardientscha e speranza.»

Suenter la saira d'infurmaziun a Casti, èn Daniel Rizzi ed Andrea Müller turnads cun buns sentiments. Müller resumescha: «Che quai è propi pussaivel da construir a Vazerol. Che la finanziaziun è pussaivla damaun cun ina prefinanziaziun. Gea, nus pudain ir.»

Schebain che bandunar Brinzauls n'è betg simpel per nagin, para che tuts stoppian pli baud u pli tard acceptar l'idea da bandunar lur bella patria. Per Daniel Rizzi ed Andrea Müller è Vazerol il lieu gist per lur futur, ed els vulan construir là uschè spert sco pussaivel.