Siglir tar il cuntegn

Header

audio
Scolaras e scolars da Schmitten duain ir a Tavau a scola
Or da Actualitad dals 19.10.2022.
laschar ir. Durada: 3 minutas 13 Secundas.
cuntegn

Ferrera/Schmitten Tavau sclerescha detagls davart midada dal lieu da scola

Fin mez november vul Tavau decider sch'igl è pussaivel da surpigliar ils scolars da Schmitten. Il mument van quels a scola en val d'Alvra. Da nov duessan ils scolars ir a Tavau a scola. Quai è la decisiun da la radunanza communala dal 2018. Il chantun è cunter questa midada.

La suprastanza da Tavau vuless gugent introducir il stgalim da basa per la scola a Tavau-Tagn/Wiesen. Quai vul dir, ch'ils dus onns da la scolina, vegnissan colliads cun ils emprims dus onns da la scola primara. Uffants tranter quatter ed otg onns vegnissan uschia instruids communablamain. En il Grischun fiss quai in novum. Tavau è persvadì che quai pudess funcziunar. Tenor la suprastanza da Tavau fiss l'avantatg ch'il lieu da scola a Tagn/Wiesen vegniss rinforzà uschia.

Chantun è cunter midadas

Il chantun na vul dentant savair nagut da quest model cun stgalim da basa, sco quai che l'uffizi per la scola populara ed il sport scriva sin dumonda dad RTR. Cun la revisiun totala da la lescha da scola avant 10 onns, saja la scolina vegnida fixada da nov sco agen stgalim en la scola populara. Uschia saja tenor la lescha pussaivel da frequentar la scolina senza in obligatori ed i vegnia plinavant purschida la pussaivladad da midar flexibel sin il stgalim primar. Perquai na vesia l'uffizi da scola nagina necessitad u plivalur, d'introducir il model menziunà.

Visà contracts cun consorzi da scola en Val d'Alvra

La vischnanca da Ferrera/Schmitten ha visà il contract cun il Consorzi da scola Belfort davains sin il proxim onn da scola. Schmitten vul trametter ils scolarets e scolars a Tavau a scola a partir da l’onn da scola 2023/24, quai sin basa d’ina decisiun da la radunanza communala. Il mument van ils uffants da Schmitten a scola ad Alvagni ed a Casti. La regenza grischuna era da l’avis ch’ils uffants da Schmitten duessan restar en ils consorzis da scola da la Val d’Alvra. La Dretgira administrativa grischuna ha lura decis che l’autonomia communala da Schmitten saja pli impurtanta che la scola cuminaivla en la val.

RTR novitads 18:00

Artitgels legids il pli savens