Siglir tar il cuntegn

Giglia Gantenbein Bleras colurs, dentant era dolurs en l'India

Giglia Gantenbein è creschida si a Casti ed è ida per dus mais en l'India a tgirar las persunas en pitschnas vischnancas. In'experienza ch'ella na vegn betg ad emblidar.

Giglia Gantenbein è tgirunza diplomada ed ha lavurà en chasas da vegls ed en ospitals. Era durant la pandemia. Là ha ella alura vis che persunas en la tgira lavuran fitg bleras uras per di e che na stan betg bain. Tenor la giuvna da 25 ans saja quai stà ina ingiustia. Ella vuleva gidar là nua ch’ella po. Tras in enconuschent hai dà la chaschun dad ir en il sid da l’India cun l'organisaziun d’agid Regenboog. Per ella èsi ina terra cun bleras colurs. Ed ella ha vis chaussas ch’eran novas: bler traffic sin las vias, vatgas entamez da la via, blers tuctucs ed blers scooters cun si in’entira famiglia.

Ina pratica sin rodas

Là è Giglia Gantenbein ida per dus mais en las vischnancas che n'han nagin provediment da sanadad. Ella ed in squadra da ses persunas avevan in camiun, pia ina pratica sin rodas. La glieud haja adina spetga en lingias lungas per survegnir agid. I sa ha tractà da pressiun da sang auta, fevra u plajas che avevan da vegnir dischinfectadas. Per Giglia Gantenbein saja stà grev d’acceptar diagnosas ch’en vegnidas fatgas spertas.

Sche quest paziaint fiss stat en Svizra alura ins vess anc guardà sch’ins savess anc far fisioterapia u ergoterapia, ins avess coordinà anc quai e tschai. E sur tut ins avess prendì sang per insumma dir tge che questa persuna ha.
Autur: Giglia Gantenbein Era per dus mais tgirunza en l'India
Giglia Gantenbein, Indien, Hilfsprojekt, Regenboog Fundadtion
Legenda: Giglia Gantenbein ha survegnì ina secunda famiglia en l'India RTR

En l’India, tar la pratica sin rodas aveva quai dentant d'ir spert. Bleras persunas han survegnì antibiotica. Era sche Giglia Gantenbein n'era betg adina 100% d’accord, ha ella fatg quest cumpromiss cun sasez, numnadamain era quai l’unica via da gidar a questas persunas. En ils ospitals publics na funcziuna l’agid betg, quai di Giglia Gantenbein suenter ch’ella ha visità in. En ina stanza cun 36 letgs, sin quests letgs n'aveva quai betg mo 36 persunas.

I saja tschuf, quests maletgs terribels vegnan a restar ad ella. Tant dapli sa era ella cunscienta quant impurtant che sia lavur è. Dentant sa ella era, che en las vischnancas nua che sia squadra era betg, guardia ora mender.

Artitgels legids il pli savens