En il Center da Capricorns a Vargistagn è vegnì fatg festa la sonda. Igl ha dà paunins, liongias frestgas, trategniment musical, referats dals iniziants ed ina discussiun al podium, nua ch'ins ha anc ina giada laschà reviver l'entira istorgia ed il success dal Center da Capricorns.
Avant 20 onns è il Center da Capricorns vegnì fundà – e da lez temp n'era l'atmosfera insumma betg da festivar. L'hotel a Vargistagn ha scrit cifras cotschnas, igl ha dà bler da renovar e nagin n'ha gì interess d'investir en quest project.
La vischnanca ha ditg ponderà sch'ella duai vender l'hotel. La fin finala ha ella dentant empruvà da salvar il hotel ed ha fundà il Center da Capricorns.
Jau aveva natiralmain la speranza che quai funcziunia, ma propi pudì crair ch'i vegnia ora ina giada uschè bain, quai n'hai jau betg.
Enfin ch'il project ha dentant gì success èn ils iniziants vegnids confruntads cun numerusas sfidas. «Igl ha duvrà bler sustegn finanzial», di Hansjörg Hassler. «Il bajetg è fitg grond, igl ha dà bler per renovar.»
I na saja dentant betg mo gartegià perquai ch'els hajan gì cletg – i saja era stà il dretg mument, manegia il co-iniziant Casper Nicca. El era da lez temp president communal da Vargistagn. «Jau crai ch'il temp è lura stà madir per ina tala idea», di el. Puncts decisivs èn dentant era stads il sustegn da la vischnanca, donaziuns da daners anonimas ed ina gronda lavur voluntara.
-
Bild 1 von 3. A la festa hai musica populara, da mangiar, grill e perfin in pitschen martgà. Bildquelle: RTR.
-
Bild 2 von 3. Intgins eran en curtin, auters pli gugent endadens en l'hotel ed anc auters han nizzegià la chaschun ed han guardà l'entir hotel da l'intern. Bildquelle: RTR.
-
Bild 3 von 3. La discussiun da podium. Bildquelle: RTR.
Il Center da Capricorns a Vargistagn è in'istorgia da success: in indriz cun in parc natiral, cun in'exposiziun da capricorns, in hotel da wellness ed in lieu da lavur per la scola auta da Turitg ZHAW. Che quest center ha ina gronda impurtanza per la vischnanca – quai sent'ins era tar ils indigens.
Senza il Center da Capricorns fiss Vargistagn in poveret.
Hansjörg Hassler è satisfatg e losch, co ch'il Center da Capricorns è sa sviluppà ils davos onns. La finamira dals proxims onns na saja betg exnum da crescher u d'augmentar, mabain da mantegnair il center sco el è ussa ed era da collavurar vinavant cun il parc da la natira e la scol'auta da Turitg.