Siglir tar il cuntegn
Inhalt

Grischun Central Giuven da 16 onns ha dà fieu a Tusaun

L'incendi da Tusaun è sclerì. In emprendist da la fatschenta da la Landi ha confessà ch'el haja mess il fieu. Tge raschuns ch'il giuvenil ha gì n'è anc betg sclerì. Quai ha la Procura publica dal Grischun communitgà.

Pumpiers stezzan la Landi.
Legenda: L'incendi da la Landi dals 14 da december è sclerì. RTR / Linus Livers

Curt suenter l'incendi hai dà indizis che l'incendi savess esser stà intenziunà. Las investigaziuns han manà la polizia tar il giuven da 16 onns. L'emprendist tar la Landi ha confessà il delict. Sco el ha explitgà vers la polizia haja el derschì liquid inflammabel sin il palantschieu e silsuenter envidà il liquid cun in battafieu.

Tge ch'ha intimà il giuvenil tar quest delict n'è anc betg sclerì. La polizia investighescha vinavant. Cunter il giuvenil è vegnì instradà ina procedura penala pervi da incendi intenziunà. Cunzunt la situaziun persunala dal giuvenil duaja vegnir sclerida, per pudair examinar las mesiras pussaivlas e la puniziun dal giuven. Per quai vegnia eventualmain era fatg in'expertisa psichiatrica.

Il brischament dals 14 da december aveva chaschunà donns d'enturn 8 milliuns francs.

RR novitads 15:00