Il rempar idraulic da Burvagn en il Surses è puspè en funcziun. Quai suenter ina fasa cun lavurs da bunamain dus onns. Cun las adattaziuns adempleschia l'ovra puspè las leschas – quai che pertutga la quantitad d'aua restanta necessaria, scriva l'Ovra electrica da Turitg en ina communicaziun.
Vitiers ha l'interpresa construì in nov implant electric pitschen. Quel duai producir mintg'onn fin ad in'ura gigawatt electricitad regenerabla. Quai correspunda tenor EWZ al consum da circa 220 chasadas grischunas ordinarias. L'energia producida vegn furnida directamain en la rait da distribuziun regiunala. Il cussegl da la citad da Turitg aveva approvà var 4 milliuns francs per construir l' ovra electrica. En connex cun la realisaziun han ins resguardà – sche pussaivel – planisadras e planisaders locals ed interpresas commerzialas.
Proteger flora e fauna durant producir electricitad
Ils 26 da zercladur 2024 aveva il cussegl da la citad da Turitg concedì var 4 milliuns francs per l'ovra idraulica da dotaziun al rempar idraulic Burvagn da l'ovra electrica Casti vest. Cun quests daners duevan vegnir realisadas mesiras da construcziun, per che la EWZ possia garantir la quota d'aua restanta en la Gelgia ch'è prescritta da la lescha ed a medem temp producir electricitad.
Il motiv per quai è stada la prolungaziun da la concessiun per utilisar la forza idraulica da la Gelgia che pretendeva ina quantitad d'aua restanta suffizienta per proteger la flora e la fauna. Quest project è vegnì finanzià sur in credit general existent da 200 milliuns francs per implants da producziun d'energia regenerabla ch'il pievel turitgais aveva approvà l'onn 2021.
Or da l'archiv: