Bainbaud cumenza il campiunadi mundial da ballape 2026 en ils Stadis Unids da l’America, en il Canada ed en il Mexico. Nov è ch’il turnier cumpiglia 48 equipas e betg sco enfin uss 32 equipas. Quest augment d’equipas ha era consequenzas per las nundumbraivlas persunas sin l’entir mund che rimnan ils maletgs da panini – cun ils purtrets dals ballapedists da mintga naziun participanta. Suenter decennis è la vendita dals tatgaders in grond affar. Sco blers fans da ballape ha Jolanda Bellini-Guetg da Parsonz strusch pudì spetgar sin ils 7 da matg, cura ch’ils paninis en vegnids en vendita.
Prest 40 onns rimna ils tatgaders.
La dunna da prest 70 onns n’è betg mo ina rimnadra passiunada dals paninis. Ella è er in grond fan da ballape, cunzunt dal CB Surses: «Prest 40 onns rimna ils tatgaders. Rimnà haja quels per in nev, per mes figls ed ussa er anc per mes sutnevs.» Tar ils Bellinis a Parsonz è ballape omnipreschent cun ina excepziun. Giera Bellini-Guetg, l’um da Jolanda Bellini-Guetg, n’è betg in uschè grond amaour da ballape. Persuenter è sia dunna in fan da ballape passiunà er perquai che ses nev, ses sutnevs e cunzunt il figl Giatgen Mitgel Bellini gioga gia prest 20 onns tar l’ina u l’autra equipa dal CB Surses.
Pajà per 700 tocs 125 francs
Jolanda Bellini-Guetg raquinta ch’il di ch’ils tatgaders sajan vegnids en vendita saja ella stada a Tusaun, ma deplorablamain turnada a chasa senza ils paninis. Cumprà haja ella la fin finala la scatla cun 700 tatgaders en il Volg a Riom per 125 francs. Surstada saja ella cunzunt stada che sulettamain bun 40 tocs eran dubels. Pia ch’in maletg d’in giugader era dubel.
Per l’album dals tatgaders dal campiunadi mundial da ballape 2022 a Katar era quel plain cun 670 paninis. Actualmain dovri 980 tocs per emplenir l’album cun 112 paginas. In pachet cun set maletgs custa 1.50 francs. Enfin ussa custava in pachet 1.00 franc, ma persuenter devi sulettamain tschintg paninis. Da cumplettar l’album dovri tenor calculaziuns dal computer passa 1’000 pachets, uschia ch’ils custs muntan a 1’500 francs.
Zavrads vegnan ils tatgaders per il figl
Jolanda Bellini-Guetg ha alura punctuà ch’ella na dastga betg tatgar ils paninis en l’album. Quai fetschia exclusivamain sulettamain ses figl Giatgen Mitgel Bellini sez. I na saja insumma nagin tema ch’ella possia tatgar ils paninis en l’album. Ses figl saja da l’avis che sia mamma na fetschia quai betg correct, exact e precis. La dunna ha er anc ditg ch’in da ses sutnevs telefoneschia savens per savair quants dubels tatgaders ch’ella haja propi. Ses figl Giatgen Mitgel Bellini saja lura mo pront da barattar ils paninis cun ina cunvegna, detg auter per trais tatgaders retschaiver sis tatgaders.