-
Bild 1 von 4. Malgrà trid'aura giuadan osps ed indigens la terrassa tar l'ustaria Tigignas. Bildquelle: RTR.
-
Bild 2 von 4. Sin la terrassa da l'ustria Tigignas hai anc gì plaz. Bildquelle: RTR.
-
Bild 3 von 4. Pliras persunas han stuì seser en la naiv perquai che la terrassa tar il take away a Somtgant era plaina. Bildquelle: RTR.
-
Bild 4 von 4. «Sa reparter sin la terrassa n'è betg pli lubì, ma s'entupar giuadora en 15 persunas schon.» – giasts ed indigens na chapeschan betg la decisiun. Bildquelle: RTR.
Blera tschajera, fraid e bletsch. Las cundiziuns meteorologicas n'èn insumma betg optimalas per giudair la davosa fin d’emna cun terrassas avertas, la sonda vargada. Tuttina nizzegian blers la chaschun da baiver in café, té u ina tschigulatta chauda sin la terrassa da l’ustaria Tigignas.
Chapientscha che las terrassas vegnan serradas n'han ils indigens sco era giasts dumandads betg.
Cura ch’ils da Turitg avevan vacanzas avevan las terrassas avert ed uss cura ch’ils Grischuns han vacanzas serran els las terrassas.
Jau na sai betg chapir quai. Il chantun Grischun ha fatg ina buna lavur cun laschar avert las terrassas.
Jau crai che quai saja in confess ed ins veglia mussar bainvulientscha cun serrar las terrassas. Ma che quai fa ina differenza u porta insatge, quai na crai jau betg.
Jau chat quai curius. Las terrassas èn stadas avertas in pèr mais e quai ha funcziunà fitg bain. Jau chat quai schon donn. Quai na stuess betg esser.
Sa reparter sin la terrassa n'è betg pli lubì, ma s'entupar giuadora en 15 persunas schon. Quai na fa betg senn.
In scolast da skis fa cunzunt quitads che las persunas sesian lura simplamain insanua e che quai pudess lura vegnir malsegir pervia da las autras skiunzas ed ils snowboardists.
Las pendicularas na levan betg prender posiziun ed il manader da l'ustaria Tigignas na saja betg stà denturn.
Gia uss seser en la naiv
Tar il take away a Somtgant, ina staziun cun la cabina pli ensi che Tigignas, èn tut las maisas plainas. In pèr giasts e famiglias sesan giun plaun en la naiv. Dus babs cun trais uffants èn vid baiver insatge. Els fissan gugent sesids vid ina maisa, ma i n'ha betg plaz pli. Ma malgrà in tgil bletsch giaudan ils uffants il temp en la naiv.
Ed era ils giasts ed indigens giaudan ils davos dis sin las terrassas. Entant perfin cun in pèr radis da sulegl che pon cuchegiar tras la tschajera.