Siglir tar il cuntegn

Header

cuntegn

Lai Arena da biatlon restructurescha per esser fit per cuppa mundiala

cursa da biatlon
Legenda: Per in manaschi persistent dovria quai ina purschida professiunala sur l'entir onn. MAD / Arena da biatlon

L'Arena da biatlon SA a Lantsch mida si'organisaziun per esser pronta per pussaivlas cursas da la cuppa mundiala ils proxims onns. Dasper la partiziun dal manaschi vegnia creada la nova partiziun da concurrenza, scriva l'Arena da biatlon. Sur onn duai questa partiziun sa concentrar sin l'organisaziun da concurrenzas naziunalas ed internaziunalas. Installada vegn la partiziun nova dal mainagestiun actual Silvio Baselgia. Per la partiziun ch'organisescha il manaschi cun tgira da giasts e scolaziun tschertga l'arena ussa in nov mainagestiun.

Finamira: Cuppa mundiala a Lai

Cun la nova partiziun spera l'organisaziun da pudair vegnir a Lai cun ina cursa da la cuppa mundiala. Gia ussa saja l'Arena da biatlon s'annunziada regularmain per concurrenzas pli grondas. Per la cuppa mundiala n'haja quai però anc mai tanschì, scrivan ils responsabels. Fin ussa è la cursa la pli gronda stada ils campiunadis mundials da biatlon dals juniors (schaner 2020).

Manaschi professiunal e persistent cun crescher

Part da la strategia fa dad engrondir la purschida e l'infrastructura. Sco proxima etappa suonda l'engrondiment da la pista per skis cun roda – quai dad ussa 1,6 kilometers sin 5,2 kilometers. Tenor l'arena n'hai dà nagins recurs encunter la midada da zonas, uschia ch'igl è planisà da cumenzar cun las lavurs la primavaira 2021.

Candidatura da Lai inoltrada

L'Uniun internaziunala da biatlon decida l'atun che vegn, tge lieus che pon organisar cursas da la cuppa mundiala ils onns 2022 fin 2026. La candidatura da Lai en collavuraziun cun Swiss-Ski saja gia inoltrada tar l'uniun internaziunala, scriva l'Arena da biatlon.

Ord l'archiv:

video
La naiv artifiziala da Lantsch
Or da Actualitad video dals 02.11.2019.
laschar ir

RTR novitads 10:00

Artitgels legids il pli savens

Scrollar a sanestra Scrollar a dretga