Ils dis chauds ch'han envidà da far in sigl en l'aua fraida paran d'esser ussa per propi istorgia. Ed uschia finescha er la stagiun da bogn dals lais e bogns averts dal Grischun. Perquai avain nus vulì savair da Gion Plaz, il mainafatschenta-substitut dal kiosc al Lai Barnagn da Savognin sco ch'el ha resentì questa stad.
Gion Plaz, Vus avais passentà la gronda part da questa stad en ed enturn il kiosc dal Lai Barnagn a Savognin. Ed avais procurà per il bainstar dals giasts ch'èn vegnids da lunsch e manaivel. Tge è stà per Vus il pli bel mument da questa stagiun da bogn?
Gion Plaz: Ils dis da bell'aura. Cler, quels muntan per nus blera lavur, ma quai è flot uschia.
Essas cuntent cun il dumber da visitaders e visitadras durant la stad?
Gion Plaz: Questa stad è stà inqual giadas trid'aura, alura avain nus pli paucs giasts. Ma en general pudain nus esser cuntents cun la stagiun.
Avais percepì che la glieud ha puspè dapli pussaivladads da passentar il temp da stad en l'exteriur?
Gion Plaz: En mintga cas. Quai han ins percepì fitg da la stad passada a questa stad. Natiralmain, sch'ins ha puspè la pussaivladad d'ir en l'exteriur, è quai chapibel.
Hai dà quest onn insatge spezial en cumparaziun cun auters onns?
Gion Plaz: Na, atgnamain èsi stà sco adina. Sco mintg'onn la festa d'uffants e la festa dal lai. Ma quai è tut eveniments che han lieu mintg'onn.
E durant quels dis avais remartgà dapli visitadras e visitaders?
Gion Plaz: Quai è uschia, gea, ma igl è era stà dependent sch'igl era bell'aura u trid'aura.
Quant impurtant èsi da porscher als giasts, sper il far bogn, anc autras activitads sco, gist a Savognin, per exempel ils pedalos e stand-up-paddles sin l'aua enfin tar la plazza da minigolf enfin tar il pump track per velos e skateboards sper il lai?
Gion Plaz: Igl è uschia che la glieud vuless er adina dapli. E sch'ins ha l'occasiun da porscher, èsi impurtant ch'ins sa far quai e vegn er fatg.
Gion Plaz, la stagiun da bogn è a fin. Per Vus cuntinuescha la lavur en il kiosc sper il lai artifizial. Quai enfin la fin d'october cura che vegn laschà or l’aua or dal lai, per far plaz per ils parcadis da la pendiculara. Tge sa mida per Vus ussa vi da la lavur?
Gion Plaz: Vi da la lavur per nus sa mida atgnamain nagut. Clar, ins n'ha betg pli da dar or ils pedalos. Ils stand-up-paddles nagin che vuless pli. Quai sa mida tut. Ed er ils dis da lavur vegnan pli curts. Cunquai ch'il sulegl lavura ussa cun nus. Uschia avain nus er pli baud saira sontga.
E sin quai As legrais? Ch'igl è in pau pli pauc da far?
Gion Plaz: Igl è natiral schon bel, sche nus avain giasts e tut ensemen. Quai è fitg empernaivel. Ma cura ch'i va alura envers la fin da la stagiun ins è alura er led sch'igl è in pau pli patgific.
