Per l'arena da biatlon ha la vischnanca da Lantsch deliberà enfin ussa passa quatter milliuns francs, quinta Simon Willi il president communal ensemen. Ils credits per la pista da skis cun rodas n'èn betg anc calculads, uschia ch'i dat ina summa da passa tschintg milliuns francs. La gronda part da las investiziuns da prest 25 milliuns francs en l'infrastructura han surpiglià chantun, Confederaziun ed investiders privats. Per Simon Willi èn ils daners da la vischnanca daners bain investids. Lantsch haja profità – er sche quai na sa betg vegnì mussà en francs e raps. Dapli abitants, investiziuns en hotels ed abitaziuns, dapli giasts dal di, quai sajan ils effects positivs.
Effect positiv per il turissem
Che l'Arena da biatlon ha in effect positiv per il turissem da Lantsch e natiralmain per l'entira regiun Lai sa mussa il meglier da stad ed il mais da november, di il president da l'uniun da turissem Lantsch Bruno Zenklusen. Il november na saja ussa betg pli in mais mort e plinavant sajan en vischnanca logicamain dapli atlets ed atletas ed uschia er confamigliars e fans che pernotteschan en abitaziuns da vacanzas e visitan er las ustarias en vischnanca.
Ussa credit per campiunadi mundial
En la radunanza communala dals 19 d'avrigl è vegnì decidì in ulteriur credit dad 810'000 francs per il campiunadi mundial 2025. Davart quest credit decida la fin finala il suveran a l'urna. Enfin ussa èn tut ils credits dumandads en connex cun l'Arena da biatlon vegnids approvads ils davos onns.
2006:
L’iniziant indigen Ursin Fravi lantscha ensemen cun Leo Baselgia e Simon Willli l’idea per in implant da far biatlon.
2007:
Avrigl: Radunanza communala decida credit d’impegn da radund 5,6 milliuns francs per bajegiar la Arena da biatlon Lai.
2013:
- Avrigl: Emprima badigliada per realisar l’arena da biatlon sur Lantsch
- December: Las emprimas concurrenzas han gì lieu en la nova arena
2015:
October: Vischnanca sa decida per l’investider Michael Hartweg sco partenari, e quai lubescha da realisar tranter auter il Nordic House
2017:
- Avust: L’Arena da biatlon survegn da la IBU (Federaziun internaziunala da biatlon) la licenza per organisar concurrenzas da la cuppa mundiala e campiunadis mundials.
- December: Emprimas cursas internaziunalas da biatlon (cuppa IBU)
2020:
Schaner: 500 atletas ed atlets als campiunadis mundials dals juniors e giuvenils
2021:
Settember: Emprima badigliada per la pista d’ir cun skis cun rodas. Quella vegn prolungada sin 4 kilometers, suenter che organisaziuns d’ambient han refusà in traject pli lung.
2022:
Matg: L’investider Michael Hartweg venda l'Arena da biatlon Lai SA a Swiss Ski
2023:
- Schaner: il Campiunadi europeic ha lieu ils 25 fin 29 da schaner
- December: han lieu per l'emprima giada cursas da la cuppa mundiala
2025:
Favrer: Campiunadi mundial cun ils megliers e las meglras biatletas dal mund