Il campiunadi europeic n’ha betg il medem status sco cursas da la cuppa mundiala u in campiunadi mundial. Ils megliers dal mund na partan quasi mai ad in campiunadi europeic. Tar quels è il focus cumplettamain sin la cuppa mundiala ed uss il mument sin il campiunadi mundial da biatlon che cumenza ils 8 da favrer ad Oberhof en Germania.
Er Swiss Ski ha uschia, malgrà che tut ils top biatlets fissan stads selecziunads per il campiunadi d’Europa, tramess quels dis a la partenza a Lai be la segunda garda, atletas ed atlets sco Lea Meier dal Partenz, Laurin Fravi da Lantsch u Joscha Burkhalter dal chantun Turitg.
Focus cumplainamein sin il campiunadi mundial
Las duas soras Aita ed Elisa Gasparin treneschan e sa preparan il mument en l’Engiadina sin il campiunadi mundial ad Oberhof. Niklas Hartweg, ch’è gia stà sin il podest da la cuppa mundiala en questa stagiun, sco er Amy Baserga ch’ha medemamain 22 onns treneschan il mument a Lai. Per tuttina anc avair ina schanza da gudagnar ina medaglia a quest campiunadi d’Europa sco er per far in plaschair als fans ed in zic reclama en vista a tut quai che suonda anc en questa arena da chasa vegn Swiss Ski ad almain trametter il davos di en la cursa da staffetta ils dus giuvens talents, Hartweg e Baserga, a la partenza.
Mo tuttina, a quest campiunadi d’Europa è ina giada dapli vegnì mussà si, che quai è in campiunadi cun cursas da segunda categoria per atletas ed atlets or da la segunda retscha. Igl è dentant er ina schanza per biatletas e biatlets che sa chattan il mument anc en la sumbriva dals stars.
