Siglir tar il cuntegn

Header

Lea Meier
Legenda: Lea Meier, la giuvna biatleta dal Partenz, durant la cursa singula da 15 kilometers. Keystone
cuntegn

Campiunadi d'Europa a Lai Nagin exploit dals biatlets svizzers

Las biatletas tudestgas han dominà l'emprima cursa al campiunadi europeic da biatlon a Lai. Lisa Maria Spark n'ha fatg nagins sbagls da sajettar ed uschia gudagnà aur en la cursa singula da 15 kilometers. Sia cumpatriota Selina Grotian ha gudagnà bronz. Tranter las duas tudestgas è classada Julija Dschyma da l'Ucraina.

Suenter la cursa era l'emprim Michela Carrara classada sin plaz 1. Sco ch'i para n'han ins betg s'accurschì dus sbagls da sajettar da la Taliana, perquai ch'ina concurrenta ha sajettà sin lur schiba. Carrara è sinaquai vegnida messa enavos sin il 11avel plaz.

Meier manchenta las top 30

Meglra svizra è stada Lea Meier. Cun trais sbagls da sajettar è la giuvna biatleta grischuna vegnida 33avla. Lydia Hiernickel ha stuì sa cuntentar cun il 62avel plaz e Susanna Meinen cun il 64avel plaz. Omaduas han fatg sis sbagls da sajettar. Flurina Volken è vegnida 66avla cun tschintg sbagls da sajettar.

video
Campiunadi europeic da biatlon a Lai
Or da Telesguard dals 25.01.2023.
laschar ir. Durada: 2 minutas 31 Secundas.

Victoria norvegiaisa tar ils umens

Gudagnà aur en la cursa singula dals umens sur 20 kilometers ha il Norvegiais Endre Strömsheim ch'ha tuc tut las schibas. Cun in retard da passa duas minutas ha Anton Dudchenko da l'Ucraina gudagnà argient. Bronz va al Sloven Lovro Planko.

Ils quatter svizzers n'han betg pudì persvader. Sco meglier svizzer è classà Sandro Bovisi sin plaz 55, quai cun trais sbagls da sajettar. Laurin Fravi, il biatlet rumantsch da Lantsch ed il mattadur local a quest campiunadi d'Europa, ha medemamain fatg trais sbagls da sajettar e terminà la cursa sin plaz 65. Joscha Burkhalter ha cun sis sbagls da sajettar stuì sa cuntentar cun il plaz 70 e Dajan Danuser cun otg sbagls da sajettar schizunt be cun il plaz 78.

Ils megliers svizzers han mancà

Betg stads a la partenza èn ils gronds trumfs svizzers che fan regularmain part a la cuppa mundiala. Tranter els Aita ed Elisa Gasparin sco er Lena Häcki-Gross ed Amy Baserga. Tar ils umens han tranter auter mancà Serafin Wiestner da Trin, Niklas Hartweg, Jeremy Finello sco er Sebastian Stalder.

Il venderdi stattan sin il program a Lai las cursas da sprint. La sonda datti las cursas da persecuziun ed a fin va il campiunadi d'Europa la dumengia cun las cursas da staffetta.

RTR novitads 12:00

Artitgels legids il pli savens

Scrollar a sanestra Scrollar a dretga