Siglir tar il cuntegn

Header

audio
Emprimas experientschas cun nov sistem politic
Or da Actualitad dals 18.02.2023. Maletg: RTR
laschar ir. Durada: 3 minutas 28 Secundas.
cuntegn

Lantsch Vischnanca ha fatg bunas experientschas cun nov sistem politic

Lantsch è sa decidì l'onn passà per il sistem da la direcziun communala. In sistem cun potenzial, dentant er cun sfidas.

Bun in terz da las vischnancas grischuna enconuschan quai sistem: In chanzlist communal, in manader da departament u plirs ed in president communal furman ina direcziun. Quai duai far pli effizient la politica communala, e prender giu lavur a la suprastanza communala.

Per Simon Willi, il president communal è il grond avantatg ch'affars pitschens enfin 10'000 francs na ston betg pli vegnir tractandads da la suprastanza communala. Il medem vala per dumondas sco per exempel da manar in'ustaria u lubientschas en general. Las emprimas experientschas saja bunas. Per ina vischnanca da la grondezza da Lantsch cun ses 550 abitants sajan las cumpetenzas finanzialas da la direcziun er en ina buna relaziun cun las cumpetenzas da la suprastanza.

Simon Willi
Legenda: Simon Willi President communal da Lantsch RTR, Toni Poltera

Chanzlist ha ina u l'autra proposta

Per Ursin Fravi, il chanzlist da Lantsch è vegnida vitiers ina sesida. Quella sto vegnir preparada, protocollada ed alura communitgada al team e natiralmain er a la suprastanza communala. Per el sajan quai alura repetiziuns. La cadenza saja relativamain auta, ina giada l'emna èsi sesida da direcziun e mintga duas emnas la sesida da suprastanza.

L'avantatg dad esser pli spert ed effizient en singuls affars saja senza dubi dà, el persunalmain avess dentant beneventà che la suprastanza s'entupass per exempel mintga trais emnas e fiss pli strategica.

Ursin Fravi
Legenda: Ursin Fravi Il chanzlist da Lantsch RTR, Toni Poltera

Che Ursin Fravi ha visà cun bainbaud 62 onns la plazza da chanzlist haja dentant be da far in zichel cun la lavur supplementara. El vuless ir a viagiar, e damai che la dunna è pensiunada saja quai il mument optimal.

La plazza da chanzlist a Lantsch è publitgada e cun in pensum dad 80-100% saja quai forsa er in motiv per reorganisar internamain la chanzlia, manegia il chanzlist partent cun ina leva bucca da rir.

RTR actualitad 08:00

Artitgels legids il pli savens