Aua senza fin – quai era ina giada. La regiun da Bravogn e Filisur vala bain sco regiun cun bler'aua. Las passa 50 funtaunas ed ils prest 50 bigls èn in mussament per la buna situaziun. Ils davos dus onns dentant ha per exempel er Filisur s'accurschì ch'aua curra betg senza fin. Cun la stad sitga 2022 han las funtaunas manà pli pauc'aua, il consum dentant è restà medem.
Cun preschentar ina lescha d'aua, ha il president communal Luzi Schutz er gì marveglias da cifras exactas. I saja stà surprendent da vesair ch'ils bigls dovran dapli aua ch'ils 950 abitants. Il medem mument saja er svanida aua. L'analisa intensiva haja purtà a la glisch diversas ruttadiras da las lingias dal provediment d'aua. Las reparaturas da quellas sajan stadas da basegn uschiglio avess ins fin oz in manco d'aua, è Schutz persvadì.
L'ura d'aua
Che l'aua ed en specialmain l'utilisaziun da quella n'è nagut da nov per Filisur, mussa il sguard sin l'ura d'aua. Sper il reservuar da Ruegna è er l'ura d'aua che mussa il nivel dal reservuar. «L'ura è da vesair davent da mintga chasa en vischnanca» raquinta Schutz. «Mussa la lantschetta il trais è il reservuar plain».
Filisur – il lieu d'ortulans
L'orticultura Schutz è vegnida fundada il 1905. En vischnanca han dentant bleras persunas cultivà l'atgna verdura. Sche l'ura dad aua stat en quel connex ha il president communal betg savì respunder. Per vegnir or da las mirveglias saja ussa dentant cler per el da s'interessar per l'istorgia da quella ura dad aua – er en connex cun l'elavuraziun da la lescha d'aua da sia vischnanca, manegia Schutz cun in tschegn d'egl.
