A Savognin duai dar in nov center regiunal per elavurar charn. Per quest intent vegn vendida la «Mazlareia Surses» a l'uniun «Ela Genusswelt», l'uniun che collia products da l'agricultura da la regiun e dal Parc Ela cun la hotellaria e la gastronomia, e ch'è uniun purtadra dal project per il svilup regiunal (PRE). La finamira saja da schlargiar la purschida da meztga en la regiun d'Alvra, sco la gruppa da lavur ha ditg envers la FMR. Cun surpigliar la Mazlaria Surses a Savognin saja pussaivel da nizzegiar l'infrastructura existenta.
Luigino Maffei era a la tschertga d'ina successiun en vista a la pensiun. Uschia pudain nus far diever d'ina infrastructura existenta e schlargiar la purschida da meztga ed elavuraziun da charn en la regiun.
Sco proxim vegn ussa fundà ina societad purtadra. E sin l'entschatta favrer duain er ils custs d'investiziuns esser clers. Sco Heidrun Moschitz di envers la FMR vegnia il mument il plan da business per il project elavurà per pudair trametter quel al chantun per ina consultaziun. Sin basa dal resun vegnia quel alura surlavurà u ch'i vegnia cumenzà cun il project, en il decurs dal 2024.
Auter model da gestiun
Ils 7 da favrer vegnian tut ils interessents envidads ed infurmads davart il project. Fin lura saja enconuschent tge chi dovria anc e quantas investiziuns e lavurs che sajan anc da far, uschia Heidrun Moschitz.
I vegnia a dar in nov model da gestiun: Cun in focus sin il servetsch sco chasa da maz per purs e chatschadras da la regiun, ma era cun commerzialisar per la regiun. I vegnia a dar differentas purschidas ch'ins possia eleger, dal mazzar, sur l'elavurar fin a la vendita dals products.
Parc Ela n'è betg impressari
La «Ela Genusswelt» duai colliar las producentas cun ils consuments dals products regiunals. L'uniun saja necessaria, sper il Parc Ela, perquai che mintga project da svilup regiunal dovria ina purtadra, nua ch'ils singuls projects sajan alura commembers. Er incumbensa da l'uniun purtadra saja da commerzialisar ils products. I na saja betg l'incumbensa dal Parc Ela d'esser activ sco impressari, el saja dentant commember da la «Ela Genusswelt», di Heidrun Moschitz.
Sper il center per elavurar charn han gruppas da lavur er elavurà ulteriurs projects. Tranter auter ina chascharia d'alp mobila per l'Alp da la Creusch sur Alvagni, in local d'elavuraziun per products da latg a Salouf e l'elavuraziun da puma.
