Siglir tar il cuntegn

Header

audio
Luigino Maffei a Cunter ha anc capacitads
Or da Actualitad dals 26.10.2021.
abspielen. Laufzeit 3 minutas 20 Sekunden.
cuntegn

Cunter La chasa da maz da la Mazlaria Surses è sin il pli nov stan

Fertant che bleras chasas da maz serran perquai ch’i stuessan investir memia bler, ha Luigino Maffei adina puspè investì en sia chasa da maz a Cunter. Sco il mazler di, saja la chasa da maz sin il pli nov stan pertutgant las prescripziuns dal chantun.

Construida è la chasa da maz en la zona d’industria a Cunter vegnida avant 24 onns. Sco quai che Luigino Maffei, il possessur, di, haja el regularmain e quai circa mintga tschintg onns investì. Ussa saja la chasa da maz sin il pli nov stan quai che pertutgia las prescripziuns dal chantun, ch’èn daventadas pli severas ils davos onns.

Mo occupà per la mesadad

Actualmain mazza Maffei mintg’onn radund 600 animals a Cunter. La capacitad sur l’entir onn fiss dentant dubel uschè gronda. Il pli bler marschia l’atun. La stad e surtut l’enviern sajan mintgamai stagiuns nua ch’i marschia per part fitg pauc. Cumpensar quests temps flaivels cun mazzar per exempel per grossists na saja però betg pussaivel, cun quai che là sajan ils dumbers d’animals che stoppian vegnir mazzads bler memia auts.

Mazzà dapli animals en pli paucas chasas da maz

Il Grischun ha il mument 39 chasas da maz. L’onn 2011 eran quai anc 16 dapli, sco quai che l’Uffizi per la segirezza da victualias e per la sanadad d’animals Grischun ha scrit sin dumonda da RTR. Ozendi vegnian però mazzads dapli animals ch’anc avant diesch onns. Il 2011 èn vegnids mazzads 20’898 animals. Il 2020 èn vegnids mazzads 23’929 animals.

Svilup da mazlarias en Grischun

Avrir la box Serrar la box

2011:

  • 55 mazlarias cun lubientscha da mazzar
  • 20'898 animals mazzads

2020:

  • 39 mazlarias cun lubientscha da mazzar
  • 23'929 animals mazzads

Plinavant scriva l’uffizi, ch’ils davos onns sajan vegnidas bajegiadas differentas novas mazlarias, numnadamain a Müstair, Ramosch e Langwies. La tendenza per il futur saja stabila, quai che pertutgia l’infrastructura. Problematic saja da chattar persunal qualifitgà. Differenzas dettia era regiunalmain. Uschia haja la Cadi sis mazlarias, e l’entira Engiadina mo pli ina mazlaria a Ramosch.

RTR actualitad 08:00

Artitgels legids il pli savens

Scrollar a sanestra Scrollar a dretga