Siglir tar il cuntegn

Header

audio
Reto Zanetti davart la moziun da Giacometti
Or da Actualitad dals 26.10.2021.
abspielen. Laufzeit 2 minutas 24 Sekunden.
cuntegn

Moziun Anna Giacometti La finamira – emprim mazzar lura transportar

Il local da mazzar vegn duvrà in di l’emna, il rest dal temp fa da basegn per elavurar quels animals.

Ina moziun inoltrada da la cussegliera naziunala Anna Giacometti pretenda da promover locals da mazzar decentrals, quai per evitar lungs viadis cun animals vivs enfin tar ina mazlaria. Tenor quella moziun datti adina pli paucs lieus per mazzar animals.

Tenor il mazler Reto Zanetti ch'ha fabritgà ina gronda mazlaria a Valsot fissi senz’auter pussaivel d’augmentar la capacitad da mazzar animals en ses manaschi, ma il problem è lura la pussaivladad d’elavuraziun e preparaziun. Prioritad per el è da chattar ina collavuraziun cun manaschis sco per exempel Coop.

I dettia adina pli paucs lieus da mazzar causa las perscripziuns severas, uschia il mazler engiadinais. Las investiziuns per fabritgar in local adattà èn autas ma il diever è relativ pitschen. In di per emna basta per avair avunda lavur per elavurar per ses affar ed era per quel a Scuol.

En tractativas cun Coop

Manaschis sco Coop han, tenor Zanetti, atgnas prescripziuns d’elavuraziun e d’igiena. Perquai transportan els lur animals en lieus adattads per accumplir quellas pretaisas. Ina pussaivladad fiss da mazzar ils animals en la regiun e lura pir far ils transports en ils lieus previs per elavurar e realisar ils products. El è perquai en contact cun quels manaschis per chattar ina schliaziun, pertge tenor Reto Zanetti vegn a vegnir quella pretaisa pli baud u pli tard.

La moziun d’Anna Giacometti è perquai segir ina buna basa per chattar en avegnir schliaziuns.

Svilup da mazlarias en Grischun

Avrir la box Serrar la box

2011:

  • 55 mazlarias cun lubientscha da mazzar
  • 20'898 animals mazzads

2020:

  • 39 mazlarias cun lubientscha da mazzar
  • 23'929 animals mazzads

RTR actualitad 07:00

Artitgels legids il pli savens

Scrollar a sanestra Scrollar a dretga