RTR è stà al lieu per guardar, sch'ins po anc observar raunas u rustgs che vulan traversar la via – fin ussa saja reussì cun success a passa 100 amfibis d'ir sur via vi, declera Dino Augustin dal Parc Ela.
Duas giadas a di controllescha ina persuna dal Parc Ela la saiv da protecziun a Cunter, ch'è quest onn per l'emprima giada là. L'emprima sadella è vida, la segunda e la terza era.
L'idea da questa saiv dad 800 meters è da proteger rustgs, raunas e piutschas dals autos, durant ch'els migreschan dal guaud enavos tar il puz, nua ch'els èn naschids.
Sch'igl ha la saira fitg blers amfibis sin via, cura ch'igl è in concert d'in chor en il vitg, lura moran fitg blers amfibis – quai po far ina differenza fitg gronda.
Cura ch'ils amfibis vulan traversar la via e na vegnan betg sur la saiv ora, chamindan els enstagl perlung la saiv. Uschia crodian els insacura en ina da las sadellas. En mintga sadella hai in grond rom, per ch'ils auters animals, dasper ils amfibis, pon puspè raiver ora, declera Dino Augustin.
-
Bild 1 von 4. Bildquelle: RTR.
-
Bild 2 von 4. Bildquelle: RTR.
-
Bild 3 von 4. Bildquelle: RTR.
-
Bild 4 von 4. Bildquelle: RTR.
«Mintgatant crodan en la sadella filiens, insects u schizunt mieurs», declera Dino Augustin. Ma questa saira è ina sadella suenter l'autra vida, enturn nus mo las stailas ed ils autos. Dino Augustin è in pau surstà: «avant 5 dis era qua anc in grond travagl!»
Suenter strusch in'ura avain controllà tut las 31 sadellas. Dapli ch'ina furmicla, in pèr craps e dus filiens n'avain dentant betg chattà. Forsa marschi in zic dapli tar il puz sut la via, manegia Dino Augustin – ed el ha raschun. Amez la via stat in piet brin e betg pli grond ch'in det. E cura che nus arrivain tar il puz vesain finalmain ils amfibis: raunas, rustgs, ina massa ovs, rambots e piutschas (Molch).
En trais onns duai dar in'emprima analisa da questa saiv da protecziun. Il pli ideal fiss, tenor Dino Augustin, in tunnel che manass sut la via ora. Ma questa pussaivladad saja anc lunsch en l'avegnir.