Cun il certificat po Niculina Odermatt era avair emprendistas ed emprendists. Il mument na saja quai dentant anc nagin tema, di la pura da 26 onns. La scolaziun supplementara haja cuzzà dus envierns, saja ina buna scolaziun per vegnir a savair dapli dal puresser. Ella haja emprendì bler sur dals animals. Ussa possia ella analisar l’entir affar e sappia uschia era bler dapli sur da finanzas e contabilitad. La scolaziun saja era ina buna basa per savair dapli da novas leschas, ha ditg Niculina Odermatt.
Era suenter lavurar gia diesch onns sco pura, saja la motivaziun da far questa professiun anc adina fitg gronda.
Jau sun creschida si sin in bain puril, lavur il pli gugent ordadora ed hai plaschair vi da la lavur cun ils animals sco era da lavurar cun maschinas e rastè. Per mai è quai il pli bel ch’i dat. Ed il pli bel è da far fain en la Val Faller e dad ir sin l’alp.
Donata Clopath: Surpiglià in bain puril avant 40 onns
Surpigliar suletta sco dunna in manaschi puril e quai durant in temp ch'i n'era betg usità che dunnas mainian in manaschi puril, quai ha fatg Donata Clopath. Ins pudess numnar la Donata Clopath ina «piuniera». Quai na vul ella dentant betg. Ella vesa sasezza sco umanista. Per ella n'èsi betg impurtant, schebain um u dunna. Per ella giaja per l'uman.
Sco duna na pudev jau far endretg a nagin da quel temp. Uschia che jau hai gì la libertad da nars.
Cun quai ch'ella saja stada suletta sco dunna che manava in bain puril, saja quai stà ina schanza per ella dad ir atgnas vias. La via dal cor, sco sco quai che Donata Clopath di. Per ella saja l'umor adina stà impurtant. Pudair rir sur da sasezza. Natiralmain haja ella era gì gritas en sia vita. Ma quai tutgia latiers. Ella haja inqual giada stuì morder tras. Cussegl ed agid, co sa far valair sco dunna, haja ella adina survegnì da ses contacts cun las feministas a Turitg. Igl haja dentant era dà blera glieud ch'haja vis e rencunaschì quai ch'ella faschevia. Per ella saja adinia stà normal ch'ina dunna mainia in bain puril, perquai ch'ella haja ina ferma colliaziun cun la mamma natira ed ina chapientscha per la natira. Ozendi saja l'acceptanza da dunnas sco manadras dad in bain puril bler pli gronda.
I manca dentant anc adina la chapientscha ch'i na va betg per il gender, mabain ber l'uman.
Uss è Donata Clopath pensiunada e lavura tochen la fin da l'onn anc sco impiegada sin il bain puril a Donat.
Ord l'archiv: Cuntrasts dals 20.01.2008
Il 2007 han ils Cuntrasts pudì accumpagnar Donata Clopath. Ina piuniera che produceva gia bio e purscheva vacanzas sin ses bain puril, cura che quai n'era anc nagin temar tar ils turistichers. E che tut quai n'è betg adina stà simpel e legher n'ha però betg midà sia tenuta, uschia ch'ella è anc oz pura cun corp ed olma:
