Cun la lescha da promoziun da la lingua rumantscha dat la vischnanca da la Muntogna da Schons paisa speziala al rumantsch. La promoziun po capitar via sustegn finanzial per uniuns ed organisaziuns, dentant er cun atgnas mesiras e projects da la vischnanca. Sper projects èsi previs che la vischnanca sustegna er l'integraziun linguistica dals abitants – er da minorens. Il mument èn ca. 80% da la populaziun da la Muntogna da Schons rumantscha.
Tut las vischnancas sa chattan en territori rumantsch
Marco Dolf, il president communal ha ditg vers RTR ch'ins haja elavurà las duas leschas ensemen cun la Lia Rumantscha e l'Uniun Rumantsch Grischun Central sa basond er sin experientschas fatgas en autras vischnancas. Impurtant saja stà da chattar soluziuns praticablas per la vischnanca. Uschia dastgan per exempel rapports ed expertisas esser en tudestg – il rest per rumantsch e tudestg, sco per exempel la constituziun ed auters. I saja impurtant da mantegnair e promover il rumantsch, uschia Dolf, impurtant saja dentant er la praticabladad en il mintgadi d'ina vischnanca.
Ulteriuras decisiuns
Il suveran da la Muntogna da Schons ha approvà in credit d’obligaziun da 2,5 milliuns francs per sanar la chasa da scola a Donat. Quella duai vegnir modernisada energieticamain ed esser accessibla per sutgas cun rodas. Er approvà ha la radunanza communala il quint annual da l’onn passà. Quel serra cun in surpli da 92'000 francs tar custs da trais milliuns francs.
Il restaurant «Orta» a Lon che tutgava fin uss a la vischnanca vegn vendì al fittadin da fin uss, Tobias Mula. El s'oblighescha da tegnair avert l'ustaria per almain 10 onns.
