Sutsilvans na datti betg mo a la Muntogna da Schons, ma er en Tumleastga, la Mantogna, a Ziràn ed ad Andeer. La vischnanca al pe dal Piz Beverin cun tut en tut 360 abitantas ed abitants è dentant la suletta e davosa vischnanca sutsilvana.
Reacziuns da la populaziun
Quels da la Muntogna da Schons èn stads irritads cura ch'els han udì las novas. Ins saja adina stà rumantsch, i fiss trist sche quai na fiss tuttenina betg pli uschia. L'umor forsa tipic per quels da Schons n'han almain Telgia Cantieni e Tina Michael da Donat betg pers.
Quai è da quels che han nagina idea che fan da quellas statisticas.
La fin finala saja quai be ina statistica, vegn concludì. I na vegnia betg discurrì pli bler u pli pauc Sutsilvan a la Muntogna da Schons pervia da quellas cifras. Sco minoritad da la minoritad sajan els disads da cumbatter per lur rumantsch, sajan loschs sin la scola rumantscha ed emprovian da mantegnair quai er vinavant.
Ins na duess betg ir uschè lunsch per dunnas che na discurran betg rumantsch.
Promotura regiunala da la Lia Rumantscha
Er la promotura regiunala da la Lia Rumantscha, Martina Cantieni, di che la Muntogna da Schons saja cleramain rumantscha. Ella na craja betg ch'i vegnia ussa a sa midar insatge pervia da la statistica. La scola, las uniuns, la chanzlista e l'entira suprastanza communala, tut saja rumantsch.
La communicaziun da l'Uffizi da statistica è deplorablamain malgartegiada.
La lescha da linguas ed er la constituziun determineschian cleramain la vischnanca sco rumantscha. Ma era la Lia Rumantscha na vul betg laschar valair l'interpretaziun. Perquai hajan els fatg intervenziun tar l'Uffizi federal da statistica ed ella speri che quai vegnia midà e la Muntogna da Schons vegnia puspé visibla sco rumantscha sin la charta linguistica.
