Ils organisaturs èn cuntents cun il dumber da visitaders. Cun las entradas gratuitas ch’èn tranter auter vegnidas repartidas a tut ils indigens, hajan schizunt passa 7'000 persunas visità il festival, ha ditg Roger Gruber, il pledader dal festival. Incaps pli gronds n’haja betg dà.
Vischnanca è cuntenta
Ina bilantscha positiva fa era la vischnanca da Bravuogn Filisur. I saja bel da vesair ch’il festival saja acceptà era tar ils indigens che sajan vegnids en in dumber anc pli grond che l’onn passà, ha ditg il president communal Luzi Schutz.
Ils indigens da Bravuogn e Filisur survegnan gratuit in bigliet per ir al festival da goa a Filisur. L'onn passà han radund 500 dals prest 950 abitants fatg diever da questa purschida. Quest onn èn gia radund 650 persunas stadas tar la vischnanca per in bigliet.
Sin ils radund 5'000 visitaders spetgads en tut, fa la populaziun indigena pia ora prest 10%.
I sajan blers che profiteschian dal festival, uschia fetschia la butia da vischnanca ina gronda svieuta, il turissem profiteschia da la taxa da cura e hotels plains, ed ils purs e la vischnanca vegnian indemnisads cun in tschains per ils prads. Sch’il festival vegn puspè organisà l’auter onn vegn decidì en il decurs da quest atun.
RR novitads 17:00
