Origen - «Hannibal» sut tschiel avert – cun amaturs e profis

Trais giuvnas e trais giuvens tranter 17 e 23 onns han chattà la via en l'anteriura chasa da scola a Riom per il workshop per amaturas ed amaturs interessads per il gieu en il liber «Hannibal» per far emprimas experientschas. Sut la batgetta dal sautunz professiunal Nicolas Gläsmann han els ed ellas elavurà emprimas choreografias.

Bilantscha postiva da tut las varts

Il suentermezdì ha la gruppa preschantà ses resultat al reschissur Giovanni Netzer. Lez è stà cuntent cun quai ch'el ha vis. Er il profi Nicolas Gläsmann di ch'el saja pli che cuntent, el saia surstà quant bain ch'i haja funcziunà. El haja fatg ina massa patratgs, tge ch'ins possia pretender da persunas che na sajan betg disadas da lavurar cun il corp gia l'entira vita. El haja ponderà, tge moviments che sajan realistics da far e mussar sin il palc.

Per trais dals paricipants n'è «Hannibal» betg l'emprim project e gieu sut tschiel avert cun Origen. Seraina Ulber da Segl (17 onns) è gia par la terza giada da la partida. Ins possia emprender bler dals profis ed i saja simplamain bel da star sin usché ina gronda tribuna. Er Mattiu Biancu (18 onns) è gia per la terza giada da la partida. El fa gia prest diesch onns teater. Mo far teater cun movoment saja tut insatge auter ch'il teater classic cun emprender text. Cun ils moviments hajan ins tut in'autra energia. Er las trais novizas ed il noviz han gì plaschair. Ina dad ellas ha fatg viadi quasi ina giada tras l'entira Svizra (da Genevra) per sa participar al workshop a Riom.

Ensemen cun 15 profis vegn questa stad er a star ina gruppa dad amaturs ed amaturas sin il palc tar il gieu en il liber «Hannibal» sin 2300 meters sur mar - sin il pass dal Gülgia. Las preschentaziuns vegnan ad esser durant ils mais fenadur ed avust.

Criteris cleramain definids

En l'annunzia per ils amaturs e las amaturas che han interess da sa participar al gieu al liber èn las premissase cumpetenzas giavischadas definidas cleramain. Tschertgadas vegnan persunas avertas che han plaschair da sa mover corporalmain - e dad esser ora en il liber da mintg'aura. Experientscha n'è betg necessaria; impurtant è: avertadad, prontadad da lavurar en in team, sco er disziplina, ferma voluntad e motivaziun. En il center è il tschaffen da l'experientscha cuminaivla e la prontadad da sa laschar en sin novas experientschas corporalas.