Siglir tar il cuntegn

Header

cuntegn

Origen La tur marcanta dal Güglia resta trais onns pli ditg

La tur cotschna dad Origen po restar pli ditg che previs sin il Pass dal Güglia. Il festival cultural aveva inoltrà il mars la dumonda da prolungaziun.

Origen po nizzegiar la tur cotschna sin il Pass dal Güglia enfin la fin d’avust dal 2023 per sias represchentaziuns da saut e teater. Suenter ha il festival cultural dus mais peda da dismetter la tur marcanta cun tschintg auzadas ed ina terrassa. Quai ha confermà l’Uffizi chantunal per il svilup dal territori envers RTR. Il president communal da Surses, Leo Thomann, ha ditg, ch’el beneventia questa lubientscha dal chantun.

Mo pli ina formalitad

Per la vischnanca da Surses saja ussa mo pli ina dumonda formala. Ils 24 d’avust vegnia la fatschenta tractada da la suprastanza. Oriundamain avess Origen pudì nizzegiar la tur cotschna sin il Pass dal Güglia mo enfin la fin da quest onn. Tranter auter perquai che l’interess per las occurrenzas è stà fitg grond ils davos quatter onns, ha Origen decidì d’inoltrar la dumonda da prolungaziun.

Tur pitschna vegn sbuvada

Sin il Güglia, vis a vis da la tur cotschna datti anc ina tur melna. Quella è bler pli pitschna e po vegnir nizzegià sco punct da panorama. Questa tur sto Origen però dismetter enfin la fin d’october da quest onn.

Ord l'archiv:

video
Origen construescha en aut: La tur cotschna sin il Güglia
Or da Telesguard dals 18.04.2017.
laschar ir

RTR novitads 17:00

Artitgels legids il pli savens

Scrollar a sanestra Scrollar a dretga