Per il president dal Parc natiral Beverin Daniel Camenisch, è il parc in'istorgia da success ed el di: «Jau ma dumond tgi che pudess generar ina tala plivalur economica per ina regiun, sche betg il parc.» Mintga project ch'il parc accumpogna e realisescha saja ina investiziun directa ni indirecta en la regiun, quai saja ina istorgia da success.
Per in franc che las vischnancas investeschan, survegnan ellas ina cuntravalur da 40 francs.
Per il president dal Parc Beverin è mintga project impurtant e cun esser diesch onns en la suprastanza haja el er gia fatg diversas experientschas cun tals. In parc saja in lieu da coordinaziun e la fin finala ina pussaivladad per ina regiun. Natiralmain saja la situaziun finanziala adina in punct da discussiun, uschia Camenisch. Il mecanissem simpel: spargnia la Confederaziun, fetschia quai er il chantun e generar daners or da fundaziuns ni privats saja ina lavur permanenta. Uschia saja quai franc in punct central da la direcziun e dal team dal parc. Ideas per projects vegnan numnadamain per fortuna ord il ravugl da la populaziun.
Or da l'archiv:
Dapli ha il Sutsilvan Daniel Camenisch raquintà en il Profil da RTR il 2024.
