La surpigliada da ses nov uffizi fetschia Peter Engler pass per pass, durant ils proxims mais. En il mument è Peter Engler numnadamain anc CEO ad interim da la Fundaziun Flury a Schiers.
Peter Engler ha avant lavurà otg onns per las Pendicularas da Lai, sco mainafatschenta e commember da la direcziun. E tar las Pendicularas da Tavau Claustra è el stà en la direcziun e manader da la logistica. Quella experientscha vul el ussa era duvrar a Spleia:
Ussa èsi impurtant da quietar la situaziun entaifer l'interpresa. Quai cun discurs da persunal. Uschia ch'ils collavuraturs e las collavuraturas san sco ch'i va vinavant.
Plans pli concrets n'ha Peter Engler anc betg pudì dir. Per gliez saja anc memia baud. La finamira saja dentant da surdar il post da direcziun en intgins onns ad ina persuna giuvna da la regiun.
Midada andetga
Avant curt aveva il directur partent Hacher Bernet anc ditg ch'el restia en uffizi fin la fin da la stagiun d'enviern. Sco quai ch'il commember dal cussegl d'administraziun e president da Valragn Christian Simmen ha ditg envers RTR haja Bernet gia bandunà l'interpresa en enclegientscha vicendaivla.
I dovra era in nov president
Il nov president duai vegnir elegì a la radunanza generala da l'atun. Gerhard Hanhart, il president da fin qua, aveva medemamain desditg la plazza suenter la critica e las discussiuns enturn la serrada temporara dal territori da skis l'entschatta da l'onn. La serrada ed er la communicaziun da quella han chaschunà critica. Il territori da skis Spleia Tambo è stà serrà tranter ils 2 ed ils 14 da schaner pervi da mancanza da naiv e las temperaturas autas. Cun la demissiun tirian Hanhart e Bernet las consequenzas.
Bernet è stà quatter onns directur
Bernet è stà dapi il schaner 2019 directur. Dapi lura han ins dumagnà da manar las pendicularas or da la crisa e da puspè metter quellas sin chommas fermas ed uschia segirar l'avegnir. L'interpresa sincerescha en ina communicaziun a las medias che la demissiun dals dus umens n'haja nagin effect sin il manaschi ed ils projects futurs.
